Кызылга школачыларның арга-арыг шинчилээр каттыжыышкыннарының аразынга “Арга-арыг болгаш кижи” деп республика чергелиг слёт болуп эрткен. Аңаа республиканың аңгы-аңгы булуңнарындан 17 команда киришкен. Оларның аразында Таңды, Чөөн-Хемчик, Тес-Хем, Кызыл, Тожу, Бии-Хем кожууннардан болгаш Кызыл, Ак-Довурак хоорайлардан өөреникчилер бар. Бо чылын Чаа-Хөл кожууннуң төлээлери бир дугаар боттарының күжүн шенеп чедип келгеннер.
Команда бүрүзү 3 киржикчиден тургустунган. Олар аразында арга-арыг ажыл-агыйының, экология болгаш бойдус ажыглалының янзы-бүрү талаларындан билиглерин хынап, мөөрейлешкеннер.
ТР-ниң Арга-арыг камгалаар төвүнүң, Арга-арыг ажыл-агыйы болгаш бойдус ажыглалының яамызының специалистери слёттуң ажылынга жюри кылдыр киришкен. Олар бо хемчегниң улуг ужур-уткалыын, эрттирип турар мөөрейлерниң профессионал деңнелин онзалап демдеглээн.
Слёттуң байырлыг ажыдыышкынының соонда команда бүрүзү боттарын жюри кежигүннеринге болгаш көрүкчүлерге таныштырган. Киржикчилер боттарының школазын болгаш слётка киржип келген сорулгазын таныштырбышаан, “Команданың визитказы” деп мөөрейге демниин, эп-найыралын, чогаадыкчы деңнелиниң бедиин көргүскеннер.
“Арга-арыгны камгалап арттыраалы” деп көргүзүглүг суртаал кылыр мөөрей-делгелгеге өөреникчилер фотоальбомнар болгаш буклеттер кирген төлевилелдерни белеткээннер.
“Арга-арыгның истекчилери” деп эстафета хемчегниң практиктиг кезээ болган. Аңаа өөреникчилер ыяштарның назы-харын, бедиин, шынарын, кайы хире хөйүн өөренип көрбүшаан, арганың материалдыг үнезин, мөөгүлерни, үрезиннерни, арганың үрегдекчилерин тодарадырынга, азимут-биле ажылдаарынга, баштайгы дуза чедиреринге, ол ышкаш арга-арыг эртеминге билиглерин хынаан.
13 дугаар республика чергелиг школачыларның арга-арыг талазы-биле слёдунга ниити чыып алган баллдарының түңнели-биле Таңды кожууннуң Балгазын суурундан “Позитив” командазы тиилекчи болган.
ТР-ниң Арга-арыг камгалаар төвүнүң медээлеринден.
“Шын” №19 2025 чылдың май 22
