Январь 21-де Москвага Владислав Ховалыг Федерация Чөвүлелиниң экономиктиг политика талазы-биле комитединиң даргазы Андрей Кутепов-биле ужурашкан. Ийи тала Кызылдың агаарынче айыылдыг бүдүмелдерниң үнерин эвээжедири-биле одалганың өске хевирлерин ажыглаарын сайгарган.
«Андрей Викторович Тывада «Арыг агаар» программаны боттандырары-биле холбашкан айтырыгларга чаңгыс эвес удаа деткимчени көргүскен, ооң иштинде хуу бажыңнарны өске-даа одалга системаларынче: төпчүткен одалга объектилеринче, чылыгны аңгы котёлдардан ап турар черлерже, хуу бажыңын хөй аалдыг чуртталга бажыңнарынче солууру, чырык болгаш газ-биле одалгаже чамдыызын шилчидерин планнап турар бис» - деп, Владислав Ховалыг бодунуң телеграм-каналынга болган ужуражылганы дыңнаткан.
Сөөлгү чылдарда агаарже хоралыг ыштың үнүп турарының уржуундан экологтуг берге байдалга таварышкан Кызылды арыг энергия дөстеринче шилчидери чугула апарган. 2023 чылда Тываның Чазаа «Арыг агаар» федералдыг төлевилелге киржир 29 хоорайның санынче Кызылды киирерин чедип алган. Төлевилел боттандырылгазы-биле агаарның хирлендирерин эвээжедир комплекстиг план бадылаттынган. Ында төпчүткен чылыг хандырылгазынче коммерциялыг объектилерни кожары, печкалыг одалганы эде чаартыры, чер бажыңнарны төпчүткен чылыдылгалыг амгы үениң хөй аалдыг чуртталга комплекстери-биле солууру кирген.
Оон аңгыда долгандыр хүрээлелге багай салдарлыг 23 бүдүрүлгелерге агаар хирлендирикчилериниң чогуур квотазын тургузуп, шенелдени чорудуп турар.
Энергияның өске дөстери кылдыр сугже шилчиткен газты болгаш электриден одалганы көрүп турар. Чурттакчы чоннуң электри-биле одалгаже шилчииринге беленин хынаар дээш, 2025 чылдың төнчүзүнде Кызылдың чурттакчыларынга айтырыг-харыыны чоруткан.
«Чоокку чылдарда бо айтырыгларны шиитпирлээри элээн хөй күжениишкиннерни болгаш чарыгдалдарны негеп турарындан Кызылдың агаарын арыглаар дээн сорулгаже чоорту кирер бис. Бо угланыышкында Россияның Энергетика яамызы, федералдыг Саң-хөө яамызы база "Газпром" ПАН-биле кады ажылдап турар бис» - деп, Владислав Ховалыг бодунуң бижиинде демдеглээн.
ТР-ниң Чазааның парлалга албаны.