Тываның Баштыңы Владислав Ховалыгның даалгазы-биле Тывада “Арыг хоорай. Арыг суур” губернатор төлевилелиниң боттанылгазы эгелээн.
Ооң сорулгазы: республиканың найысылалы – Кызыл хоорай болгаш кожуун төптерин арыг-силиг, чараш, айыыл чок болгаш туристерге сонуурганчыг болдурары.
2022 – 2025 чылдарда боттандырар төлевилелче Тываның Чазаа республика бюджединден 140 саядан хөй рубльди аңгылаар сорулгалыг.
Төлевилел иштинде планнап турары:
- 12 тускай техниканы садар;
- Тыва Республиканың муниципалдыг тургузугларының аразынга чылдың-на республика болгаш кожуун чергелиг чаагайжыдылга, ногаанчыдылга база арыг-силиг талазы-биле мөөрейлерни эрттирер;
- Субботниктерже хөй кижини хаара тудар;
- Аныяктарны чурттап турар девискээрин чаагайжыдып, ногаанчыдарынче хаара тудар;
- Кызыл хоорай болгаш кожуун төптеринде хөй-ниити черлериниң (парктар, сесерликтер, шөлдер, кудумчулар) девискээрин аштап-арыглаар, чаагайжыдарын, туристерге сонуурганчыг болдурарын күштелдирер;
- хоорай болгаш суурларның чурттакчыларының арыг-шеверни сагыыр харыысалгазын улгаттырар;
- чаагайжыттынган девискээрлерге чурумну, арыг-шеверни сагыырының дүрүмнерин хажытпазы-биле профилактика болгаш хыналда рейдилерин күштелдирер.
Төлевилелдиң харыысалгалыг күүседикчизи Тыва Республиканың Чуртталга-коммунал ажыл-агый яамызы сентябрь 1-де губернатор төлевилелин боттандырып эгелээниниң бирги базымын кылган.
Хоорайның база бир көскү девискээри, хем кыдыында Кызыл партизаннарга тураскаал чанында сесерликти боктан аштап-арыглаар акцияны чарлаан. Аңаа “Тываның энерелдиг чүректери” аныяктар организациязындан эки турачылар киришкен.
“Тываның Баштыңы Владислав Ховалыгның даалгазы-биле чарлаттынган “Арыг хоорай. Арыг суур” губернатор төлевилелин боттандырарынга кижи бүрүзү киржилгелиг болуру чугула. Төлевилел үш чылда көрдүнген. Ону боттандырарынче угланган аңгы-аңгы акцияларны, хемчеглерни, муниципалитеттер аразынга мөөрейлерни эрттирер бис. Хөй-ниитиниң дыштанылга черлери, парктар, сесерликтер чоорту өң кирип, чараш хевирже өскерлип турарын чурттакчылар эскерип турар болгаш аңаа доктаамал агаарлап, дыштанып кээп турары өөрүнчүг. Ам-даа чаагайжыдып, эде-хере тыртар девискээрлер хоорайда хөй. Ынчангаш бо губернатор төлевилелиниң ачызында хоорай, суурларывыс ам-даа шинчи кирип, ырак-чооктан келген аалчыларга-даа, боттарывыстың чурттакчы чонувуска-даа эптиг байдалдар тургустунар дээрзинге бүзүрээр бис.
Губернатор төлевилелиниң боттанылгазының түңнелдери-биле 2023 чылда коммунал ажыл-агый организациялары чаагайжыдылгага ажыглаары-биле көрдүнген 10 тускай техниканы болгаш өске-даа дериг-херекселдерни алыр.
Републиканың бүгү чурттакчылары бо төлевилелге идепкейлиг киржип, деткимчезин көргүзер дээрзинге идегээр бис. Төрээн чуртувустуң каас-чаражын бир демниг кадагалавышаан, оон-даа чараш болдураалыңар!” – деп, ТР-ниң коммунал ажыл-агый сайыды Мерген Мынын-оол чугаалаан.
/ К. МОНГУШ.
/ ТР-ниң Чуртталга-коммунал ажыл-агый яамызының парлалга албанының чуруктары.
