Кызыл хоорайның иштинге пассажирлер аргыштырар автобустар чоруур кудумчуларда оруктарны септеп турар. Ол дээрге чүгле Ленин кудумчузу эвес, Пушкин, Оюн Күрседи, Бүренская дээш элээн каш кудумчулар. Кызыл хоорай биле Вавилин ээтпээнде дачалар аразынга чурттакчы чонну аргыштырып турар автобустарның оруунда септелге ажылдары кидин түлүк. Бо оруктуң септелгези мэрияның шыңгыы кичээнгейинде, чүге дээрге ол оруктуң шынарындан пассажирлерни айыыл чок аргыштырары хамааржыр.
2А, 7А маршруттарлыг автобустар чоруп турар Бүренская, Университетская кудумчуларда оруктуң септелгезин эрткен 2021 чылдан эгелээш, бо чылын уламчылаан.
Оюн Күрседи кудумчузунуң Титов биле Бухтуев кудумчулар аразында кварталында автомобиль оруунуң ийиги каъдын чадарын доозуп, чадаг кижилер кылаштаар орукту кылып турар. Оруктуң бо участогунуң септелгези доостур чыгаан. Аңаа кудумчуга шимчээшкинниң чурумунуң демдектерин тургузар, асфальтыга шыйыглар чуруур ажылдарны удавас эгелээр.
Асфальт чогунуң хараазындан Малчын, Пограничная кудумчуларын маршруттуг автобустар Есенин кудумчузу-биле оюп турары-биле холбаштыр Малчын кудумчузун дүрген асфальтылаар дугайында дилеглер Кызыл хоорайның мэриязынче хамаатылардан кирип турар. Бо кудумчунуң таваан салыр ажылды 2021 чылда чоруткан, бо чылын ол кудумчуга чагыларны тургузуп, сайгылгааннарлыг чырыдыышкын ажылын чорудар, келир 2023 чылда Малчын кудумчузун асфальтылаарын планнаан.
“Айыыл чок болгаш шынарлыг оруктар” национал төлевилелдиң акшаландырыышкыны-биле Кызылдың оруктарын септээри 2023 – 2024 чылдарда уламчылаар.
Кызыл хоорайның мэриязының медээлеринден.