Чайын шөлээ болгаш дыштанылга үези кидин түлүк. Чамдык хамаатыларга амыдыралынга чаа-чаа сорулгалар болгаш өскерлиишкиннер эгелээринге таарымчалыг өй болур. Кызыл хоорайга база кожууннарга «Россияда ажыл. Арга-шинектерниң үези» деп күш-ажыл ярмарказының федералдыг чадазы болуп эрткен. Ында 1500 хире хостуг олуттарны ажыл берикчилери таныштырган.
Чазак Даргазының социал политика талазы-биле оралакчызы Орлан Сарыгларның чугаалап турары-биле алырга, ажылга хаара тудар ярмарканың төөгүзүнде онлайн хевирге Красноярск болгаш Алтай крайларның ажыл берикчилери киришкен. Тываның чурттакчылары чүгле Тыва иштинге эвес, Россияның өске регионнарынга ажылга тургустунуп ап болур.
Кадык камгалал, энергетика болгаш IT шугумунга ажылдакчылар онза чугула хереглеттинип турарын, ол ышкаш тывыш үлетпүрүнге ажылчын оолдар четпейн турар дээрзин ажыл чок хамаатылар хаара тудар төптүң удуртукчузу Айлана Бюрбю дыңнаткан.
— Бүгү-россия ярмарказының федералдыг чадазынга 30 ажыл берикчилери 1500 хире хостуг олуттарны таныштырган. Ооң мурнунда апрель 14–15 хүннеринде ук ярмарканың регион чадазынга 300 хире хамаатыны ажылга хаара туткан. Бо удаа оон хөй кижи ажылга тургустунуп алыр дээрзинге бүзүреливис улуг – деп, Айлана Бюрбю медеглээн.
Донецск Улусчу Республикада полицейжи чолаачы албан-дужаалында 20 хире, лиценциялар-биле ажылдаар төпке 20 хире ажылдакчыны, бухгалтерлер, прапорщиктер болгаш оон-даа өске ажылдакчыларны хереглеп турар дээрзин Росгвардияның Тывада эргелелиниң кадрлар килдизиниң даргазының дузалакчызы Надежда Широкова дыңнадып турар. Ол ышкаш ук албан чериниң Тывада салбырында кол инженерни, электромонтер албан-дужаалында – 4 кижини, полицейжи дужаалында 4 хостуг олутка, ОМОН-га 2 полицейжи чолаачы болгаш 4 полицейжи дайынчыны ажылче чалап турар.
Росгвардия албан-хүлээлгезинче ажылдап кирип алыр күзелдиг хамаатылар резюмезин эргелелдиң каадырлар килдизинге дужаарын дыңнадып турар. Ук документини дараазында адрестерде хүлээп турар: Кызыл хоорай, Западная кудумчузу, б. 6 азы Дружба кудумчузу, б. 118.
РФ-тиң Камгалал яамызы-биле керээ ёзугаар ажылдаар шериг албанынче хамаатылар хүлээп алыр пунктунуң инструктору Менги Монгуштуң чугаалап турары-биле алырга, күзелдиг хамаатылар ажылга тургустунуп алыры-биле долу информацияны ук пунктудан айтырып болур. Шериг албан-дужаалынче 18 хардан 60 харга чедир күзелдиг хамаатыларны хүлээп турар. Ооң мурнунда кадыының байдалы-биле кызыгаарлыг азы шииттирген хуусаазын эрттирген хамаатылар керээ ёзугаар ажылче тургустунуп болур дээрзин Менги Монгуш медеглээн.
Ажылга хаара тудар төптүң ажылдакчылары ажыл чок чонга бүгү талазы-биле дузаны, ылаңгыя бодунуң ажыл-херээн ажыдып алырынга "Социал керээ" программазын, ажыл берикчилеринге ажыл чок хамаатыларны хаара тудар сорулгалыг деткимчелер болгаш оон-даа өске программалар дугайында долу информацияны чедирип турарын сагындыраал. Ол ышкаш хостуг олуттарның даңзызы-биле «Россияда ажыл» деп онлайн порталдан таныжып болур.
/ Алиса ДОНГАК.
Буян ООРЖАКТЫҢ тырттырган чуруктары.
"Шын" №46 2023 чылдың июнь 24
