Донецк болгаш Луганск Улус Республикаларның дайынчыларынга деткимче-дуза чедирери-биле Бүгү-россияның улусчу фронтузу хөй-ниити организация (ОНФ) “Бүгү чүүлдү тиилелгеге!” деп ачы-дуза фондузунга тускай платформаны www.pobeda.onf.ru деп адресте ажыткан. Ук порталдан ачы-дузаны кайда хүлээп ап турарының дугайында чугула медээлерни тып ап болур.
“Донецк биле Луганск 8 чыл ажыр дайынчы байдалда амыдырап-чурттап, хосталгазы дээш демисежип турарын билир бис. Ынчангаш ук республикаларга ачы-дуза чугула херек болуп турар – деп, Бүгү-российжи Улусчу фронтунуң Тывада салбырының ажылчы бөлүүнүң удуртукчузу Александр Буланкин медеглээн. – Дайынчыларга бо үеде чүү чугула хереглеттинип турарын база оон билип ап болур. Акша дузаламчыны база ук портал дамчыштыр каш минута дургузунда шилчидиптер арга тургустунган. Ачы-дузаны чогум шериг корреспондентилер болгаш блогерлер чыып турар, а ОНФ оларның ажыл-чорудулгазын чаңгыс аайлап, удуртуп-башкарар ажылды чорудуп турар. Ук ажылдың кураторларының аразында Дмитрий Певцов, Владимир Соловьев, Александр Коцюба, Эдгар Запашный дээн ышкаш ат-сураглыг артистер база бар. Улусчу фронтунуң чыып турар чүүлдери – дайынчыларга хүн бүрүде херек чүүлдер болур. А шилчиттинген акша-хөреңгиге шериглерге берцы идиктер, бронежилеттер, квадрокоптерлер, аъш-чем, эм-таң аймаа дээш өске-даа амыдыралга ажыктыг херекселдерни садып ап турар. Бо бүгү ажылдың эгезинден төнчүзүнге чедир чогуур хыналда адаанда тудуп алган турар. Ылаңгыя акша-көпеек чарыгдалы шыңгыы хыналдада”.
Регион бүрүзүнде ачы-дуза чыыр пунктулар бар, Тывада – Кызыл хоорайда Кочетов кудумчузунда 30 дугаар бажың деп адресте 18 дугаар өрээлде ындыг пункт организастаттынган. Телефону: 8 (3942) 22-11-50.
