Июль 8 - Бүгү-российжи өг-бүле хүнү
Өг-бүле, ынакшыл болгаш шынчы чорук хүнүн Россияныӊ Президентизиниӊ Чарлыы-биле албан ёзу байырлалы кылдыр чарлаан.
Республикага өг-бүлениӊ үнелиг билиглерин быжыглаар база кадагалаар угланыышкынныг байырлыг хемчеглерни эрттирер дээрзин Тываныӊ Чазааныӊ парлалга албаны дыӊнадып турар.
Байырлал хүнүнде дөртен болгаш оон-даа хөй чылдар иштинде кады чурттап келген өг-бүлелерниӊ болгаш төлептиг үлегерлиг өг-бүлелерге байыр чедирер чаӊчылчаан ёзулалды эрттирер. Ада-иелерге болгаш уругларга чогаадыкчы мөөрейлерни, спортчу маргылдааларны, онлайн викториналарны, арга-сүме кадар консультация шөлчүгештерин тус-тузунда организастаан.
Июль 8-те «Өг-бүле – бүгү чүүлдүӊ эгези» деп байырлал концерт кожууннарныӊ төвүнге, бүгү суурларынга болур.
Өг-бүле, ынакшыл болгаш шынчы чорук байырлалыныӊ демдээ кылдыр ромашка деп чечекти шилээн. Бурунгу өгбелеривис ол чечекти «хой караа» деп адап чораан. Республиканыӊ шупту кожууннарынга бо неделяныӊ эгезинде «Байырлалдыӊ демдээ – ромашка чечек» деп акцияны чарлаан. Ромашка чечээн кудумчуларда, хөй-ниити черлеринде, тудугларныӊ ханаларынга, бажыӊнарыныӊ херимнеринге чуруп, каастап шимээр. Өг-бүлениӊ демдээн илереткен чечекти көргүскен чараш открыткаларны, баннерлерни кылып болур.
Көдээ культура бажыӊнарынга чогаадыкчы өг-бүлелерниӊ киржилгези-биле «Ынакшылга бүргеткен өг-бүле кезээде идегелдиг болгаш быжыг» деп хөгжүмнүг байырлал болур.
Республикада чайгы дыштанылга лагерьлеринге уругларныӊ киржилгези-биле «Ромашковое счастье» деп флэш моб эрттирер. «Өг-бүлем – байлакшылым» деп викторина, «Мээӊ найыралдыг болгаш аас-кежиктиг өг-бүлем» деп чурук мөөрейи база болур.
Июль 6–8 хүннеринде республиканыӊ консультация төптеринге «Ажык эжиктер хүнү» болур. «Аас-кежик чечээниӊ чеди бүрүзү» деп темага хамаарыштыр өг-бүлелерге педагог, психолог специалистер арга-сүмени берип, методиктиг дузаны чедирер.
Ажык эжиктер хүнү Кызыл хоорайныӊ 8 дугаар школазынга, 17 дугаар уруглар садынга, Шагаан-Арыг хоорайныӊ «Челээш» уруглар садынга, Ак-Довурак хоорайныӊ «Сказка» уруглар садынга, Мугур-Аксы суурнуӊ 1 дугаар школазынга болур.
Кожууннарныӊ төп эмнелгелери, республиканыӊ Перинаталдыг төвү июль 8-те «Ажык эжиктер хүнүн» эрттирер дээрзин чарлаан.
Чаш төлдерни байырлыг ёзу-биле божудулга бажыӊындан үндүр бижип, эргим ынак ада-иезиниӊ чылыг болгаш чырык бажыӊынче үдээр.
Өг-бүле тудуп, кады чурттап келгенинден бээр мугур санныг байырлалын демдеглээр өг-бүлелерниӊ байырлыг чыскаалын кожууннарныӊ ЗАГС албан черлери эрттирер. Бо чылын «алдын» кудазын (50 чыл оюн), «рубин» кудазын (40 чыл оюн), «шуру» (коралл) кудазын (35 чыл оюн) демдеглээр өг-бүлелер шупту аӊаа киржир.
Өг-бүле хүнүнде байырлыг бадылажылга ёзулалы болур.
Чаа-Хөл кожуунда кады чурттап турар-даа болза, ам-даа бадылашпаан өг-бүлелерге ЗАГС-тыӊ специалистери тускай үнүүшкүннү организастаар. Өг-бүле хүнүн таварыштыр оларныӊ чурттап турар черинге бадылажыр ёзулалды эрттирер.
Өг-бүле хүнүнге тураскааткан кол байырлыг хемчег республиканыӊ найысылалынга Өг-бүле парыгынга июль 8-те 10.00 шакта эгелээр.
Ада-иелерге болгаш бичии уругларга кадык чаагай амыдырал болгаш өске-даа чугула айтырыглар талазы-биле консультация бээр тус-тус организацияларныӊ, ведомстволарныӊ төлээлери аӊаа келир.
Республиканыӊ үлегерлиг өг-бүлелеринге «Ынакшыл болгаш шынчы чорук дээш» медаль тыпсыр ёзулал база аӊаа болур.
Июль 8-те Өг-бүлелерниӊ спартакиадазы «Совет Тываныӊ 5 чылы аттыг» стадионга болур. Спортчу хемчегге киржир күзелдиг өг-бүлелер билдириишкинни июль 7-де 16.00 шакка чедир электроннуг почтаже: usm_18@mail.ru чорудар. Харылзажыр телефону: 8 (394-22)-3-00-30.
Республиканыӊ Спорт яамызы спартакиаданыӊ дүрүмүн Контактыда арнында чарлап каан дээрзин дыӊнадып турар.
Р. Демчик белеткээн.