Россияның Тудуг яамызы чаагайжыдар девискээрлер болгаш дизайн төлевилелдер шилиир IV Бүгү-российжи онлайн-бадылаашкынның түңнелдерин үндүрген.
«Чуртталга болгаш хоорай хүрээлеңи» национал төлевилелдиң «Таарымчалыг хоорай хүрээлеңин хевирлээри» федералдыг төлевилел чорудуунга март 15-тен апрель 30-ге чедир бадылаашкын болуп эрткен. Бадылаашкын үезинде Тыва Республика бадылааннарның саны-биле лидер регионнарның санындан дүшпээн. Ооң дугайында Россияның тудуг болгаш ЧКА сайыды Ирек Файзуллин демдеглээн: «Чечен Республиканың чурттакчылары эң-не идепкейлиг киришкен. Оон аңгыда, Тыва Республика, Свердловск облазы, Ставрополь край, Томск облазы, Ямал-Ненец автономнуг округ, Башкортостан Республика идепкейжи регионнарның санында».
Российжилерниң шилилгезинче 1,5 муң муниципалдыг тургузугда 5,4 муң объектини салган. Тыва шупту 19 муниципалдыг тургузугда 87 эскиз төлевилелди таныштырган. Бадылаашкынның түңнелинде эң-не хөй үн алган черлер дараазында үнер 2025 чылда чаагайжыттынар.
Бо чылын чуртта 214,8 муң кижилиг волонтёр корпузу хамаатыларның бадылаашкынынга дузалашкан. Тывага 1620 аныяктар эки турачылап ажылдаан.
Тывага чаагайжыдар объектилер бадылаашкынынга республиканың 164275 чурттакчызы үнүн берген.
База ол ышкаш Донецк база Луганск Улус Республикаларның, Запорожье облазының чурттакчылары бадылаашкынга ийи дугаар киришкенин Россияның Тудуг яамызының баштыңы демдеглээн. Херсон облазы биле Байконур хоорайның чурттакчылары бадылаашкынга бир дугаар киришкен.
Бай-Тайга, Барыын-Хемчик, Чөөн-Хемчик, Кызыл, Бии-Хем, Тес-Хем, Тере-Хөл, Тожу, Чаа-Хөл, Чеди-Хөл, Улуг-Хем кожууннарның база Ак-Довурак биле Кызыл хоорайларның объектилеринде ажылдар эрткен чылын эгелээнин Тываның Тудуг яамызы дыңнаткан. Бо чылын ниитизи-биле 30 хөй-ниити дыштанылга черин чаагайжыдып тудар.
ТР-ниң Чазааның медээлеринден.
«Шын» №33 2024 чылдың май 4