РФ-тиң Президентизиниң Сибирь федералдыг округунда бүрүн эргелиг төлээзи Анатолий Серышев округтуң регионнарынга 2024—2025 чылдарда одалга сезонунга белеткелиниң болгаш ону эрттирериниң дугайында округ хуралын эрттирген. Тываның Баштыңы Владислав Ховалыг видеоконференция харылзаазы-биле ол хуралга киришкен.
Сибирьде одалга сезону үезинде эгелээн. Келир кышка 26 муң километр чылыг четкизин белеткээн, солаан ийикпе азы бүрүнү-биле септеп чаарткан четки үлүү улгаткан. Округта одаар чүүлдүң курлавырын четчелээн: хөмүрнү хереглелден 6 катап хөйге, а мазутту – 4 катап хөйнү белеткээн.
Ростехнадзор 2024 чылдың ноябрь 15-те муниципалитеттерни хынаарын доозуп, белениниң паспорттарын тывысканын хуралда дыңнаткан. Округтуң муниципалдыг тургузугларының 85,3 хуузу, а Алтай Республикада 100 хуузу паспорттарын алган.
Россияның Камгалал яамызының инфраструктуразы: шериг хоорайжыгаштарының ЧКА шупту объектилери белениниң паспорттарын ап, келир кышка белеткел ажылдарын эки чорутканын А. Серышев онзалап демдеглээн. Омск, Иркутск, Братск, Новосибирск, Новокузнецк, Бердск дээн ышкаш улуг хоорайларда белеткел паспорттары-биле байдал дүвүренчиг дээрзин бүрүн эргелиг төлээ айыткан.
Ростеххайгааралының илереткени четпестерни чайладыр база белениниң паспортун албаан муниципалдыг тургузугларга одалга сезонун онза болуушкун чок эрттирерин организастаар талазы-биле бирги чергениң хемчеглер планын дүрген ажылдап кылыр даалганы эрге-чагыргага берген.
Коммунал системаларның бүзүрелдиг ажылын экижидер комплекстиг болгаш системалыг хемчеглерни хүлээп алырының чугулазын бүрүн эргелиг төлээ айыткан. Регионалдыг күүсекчи эрге-чагырга органнарының мурнунга инвестиция программалары база чөпшээрежилге дугуржулгалары-биле ЧКА объектилерин септээр хүлээлгени хуу организацияларның күүседип турарынга контрольду хандырар даалганы берген.
Коммуналдыг инфраструктура чаартыр хемчеглерниң күүселдезин сайгарып, ындыг программаларга акшаландырыышкынның эвээжеп турарын чайладыр дээш, чуртталга-коммунал ажыл-агыйын чаартыр талазы-биле регионалдыг күрүне программаларын анализтээри чугула деп демдеглээн. «Чуртталга-коммунал адыры – чоннуң эң-не дүвүрээзинниг кезээниң бирээзи. Ооң хөгжүлдезинче салыышкыннар кызырлып эвес, а көвүдээр ужурлуг» – деп, бүрүн эргелиг төлээ чугаалаан.
Хуралда Сибирьниң чырык четкизиниң бүзүрелдиг ажылдаарын хандырар хемчеглерни база чугаалашкан. «Эрге-чагырга органнары, энергетика компаниялары чырык четки инфраструктуразының байдалын контрольга тудары чугула. Ылаңгыя чырык чедишпейн баар регионнар – Иркутск облазы, Хакас Республика база Красноярск край» – деп, бүрүн эргелиг төлээ демдеглээн.
«Майнинг компаниялары ажыл-чорудулганы өйлеп-таарыштырарының хоойлужуткан шиитпирлерин хүлээп алган» – деп, бүрүн эргелиг төлээ сагындырган. Ооң-биле кады чедишпес күчү-күштү оон-даа ыңай көвүдээрин болдурбас дээш, энергия хереглекчилерин контрольдаар ажылды ам-даа уламчылаар. Иркутск облазында губернаторнуң чанында нарын байдалдарже дораан хөделир тускай штабты тургускан. «Энергетика чедишпейн баар айыыл бар Сибирьниң өске регионнары Иркутскуда коллегаларындан үлегерни алырын сүмеледим» – деп, бүрүн эргелиг төлээ хуралдың киржикчилеринге чугаалаан.
