Хүндүлүг чаңгыс чер чурттугларым!
Силерге Россияның хүнү-биле ТР-ниң Дээди Хуралының депутаттары байыр чедирип тур бис!
Бистиң Төрээн чуртувус – делегейде күчү-күштүг улуг күрүне болгаш эң чараш чурт болур. Аңаа хандыкшылывысты, ооң төөгүзүнге болгаш онза культуразынга хүндүткелди болгаш чоргааралды, каас-чараш бойдузунга омакшылывысты чүректеривисте бүгү назынывыста шыгжап, мындыг байырлыг хүннерде илередип чоруур бис.
Сөөлгү чылдар Россияга амыр эвес, шылгалдалыг болза-даа, чуртувустуң ниити хөгжүлдези уламчылап турар. Ооң хөй омак-сөөк чоннары хамык-ла бергелерни шыдамык, бодамчалыг ажып эртип чорлар. Тускай шериг операциязы бүгү чурттакчыларны хаара тудуп, демнештирген. Ооң түңнелинде чуртувус барыын чурттарның шаптараазыннарын ажып эртип, а харын-даа бодунга ниити бурунгаар депшилгени хандырып тур. Амгы үеде Россияның экономиктиг байдалы эки, күчү күжү улуг болгаш туружу быжыг. Ынчангаш кандыг-даа кызагдаашкыннар аңаа дыынмайн турар. Делегейде ооң ат-алдары база бедик. Бо байдалдар хүнден хүнче чүгле экижиир.
Улуг байырлалывыс-биле силер бүгүдеге быжыг кадыкшылды, менди-чаагай чорукту, ажыл-ижиңерге чедиишкиннерни болгаш бүгү-ле сорулгаларыңар ыяап-ла боттанырын күзедивис.
Байырлал-биле! Россияның хүнү-биле!
Хүндүткел-биле, ТР-ниң Дээди Хуралының (парламентизиниң) Даргазы К. ДАВАА.
«Шын» №22 2025 чылдың июнь 1