Башкылар хүнүнге тураскааткан байырлал Улусчу чогаадылга бажыңынга дүүн, октябрь 4-те, болуп эрткен. Аңаа республиканың Улус өөредилгезиниң хоочуннары, аңгы-аңгы эртемнерниң болгаш кижизидилге ажылының башкылары чыылган. Олар Башкы хүнү-биле бот-боттарынга байыр чедирип, ачы-буянныг ажылынга чедиишкиннерни, быжыг кадыкшылды, аас-кежикти күзеп турганнар.
Башкы хүнүнүң мурнунда үеде эрткен Башкыларның улуг неделязы өөредилге-кижизидилге адырының каш аңгы угланыышкыннарында ажылдап турар башкылар боттарының ажылынга сагыш-сеткилинден бердингенин, оларның бедик профессионал эртем-билиглиин, байлак арга-дуржулгалыын бадыткаан.
2024 чылды Россияга Өг-бүле чылы кылдыр чарлааны Башкы хүнүн байырлап эрттиреринге бир янзы хөөннү киирген. Өөреникчи оолдар, уруглар, оларның ада-иелери башкыларга байыр чедирип, Башкы хүнүнге тураскааткан байырлалга киришкеннер.
ТР-ниң Чазааның Даргазының оралакчызы Орлан Сарыглар Башкы хүнүнүң байырлалынга киржип, Тываның Баштыңы Владислав Ховалыгның өмүнээзинден болгаш бодунуң мурнундан башкыларга байырны чедирип, өөредилге-кижизидилге ажылынга чедиишкиннерни күзээн.
Педагогика ажыл-чорудулгазынга шылгараңгай чедиишкиннерлиг башкыларга Тыва Республиканың Баштыңының шаңналдарын тывыскан.
Тыва Республиканың Улустуң башкызы атты Ростислав Кенденбиль аттыг республиканың бичии уругларның уран чүүл школазының орус дыл болгаш литература башкызы Нина Кыргысовна Моңгушка тывыскан.
Өөредилге адырынга көскү чедиишкиннери дээш Тываның Баштыңының Хүндүлел бижии-биле Совет Эвилелиниң Маадыры Михаил Бухтуев аттыг Кызылдың 1 дугаар школазының төөгү башкызы Чойгана Комбуй-ооловна Кара-Сал, Кызыл-Мажалыктың 1 дугаар школазының орус дыл болгаш литература башкызы Вячеслав Ондар дээш өске-даа башкылар шаңнатканнар.
Тыва Республиканың культуразынга киирген көскү үлүү, уран чүүлге ажы-төлдү өөредиринге чедиишкиннери дээш Чаа-Хөл кожууннуң Байыр Байынды аттыг Ак-Туругнуң бичии уругларның уран чүүл школазының хореография башкызы Валентина Опуйлаага Тыва Республиканың культуразының алдарлыг ажылдакчызы атты тывыскан.
Педагогика ажыл-чорудулгазынга шылгараңгай чедиишкиннери дээш Россия Федерациязының Президентизиниң шаңналынга Кызыл кожууннуң Каа-Хем суурда Таисия Куулар аттыг 2 дугаар школаның география башкызы Рада Владимировна Моңгуш, Чербиниң ниити билиг школазының эге класстар башкызы Аяна Ким-ооловна Моңгуш, Чеди-Хөл кожууннуң Хову-Аксы ниити билиг школазының төөгү башкызы Чодураа Александровна Соян, Тыва Республиканың күрүне лицейиниң орус дыл болгаш литература башкызы Чечек Дартан-ооловна Доңгак, Тываның республика лицей-интернадының орус дыл болгаш литература башкызы Сюзана Иргитовна Көк-кыс, Ак-Довурак хоорайның 2 дугаар школазының төрээн дыл болгаш литература башкызы Сайлык Николаевна Моңгуш төлептиг болганнар.
Амгы үениң технологияларын, өөредилге программаларын болгаш төлевилелдерни өөредилге-кижизидилге ажылынга ажыглаарынга чедиишкиннерлиг башкыларга Тываның Баштыңының шаңналдарын тывыскан.
Тыва Республиканың өөредилге сайыдының албан-хүлээлгезин күүседип турар Елена Самбала башкыларга Башкы хүнү-биле байыр чедирип турда, аныяк педагогтар хоочун башкыларга чараш чечектерни тудусканнар.
Хөй чылдарда башкылаан, өөредилге-кижизидилге ажылынга шылгараан, боттарының улуг үлүүн башкыларга Тыва Республиканың Өөредилге яамызының шаңналдарын тывыскан.
Тываның уран чүүл ажылдакчылары, бичии уругларның уран чүүл школаларының өөреникчилери башкыларга байыр чедирип, ыр-шоорну, танцы-самны бараалгатканнар.
Ш. МОҢГУШ.
Буян Ооржактың тырттырган чуруктары.
“Шын” №76 2024 чылдың октябрь 5
