Январьның 18-тен 19-че дүнезинде Тывага база бүгү Россияда дег православ байырлал — Крещениени демдеглээр. Тываның биче суднолар талазы-биле харыылаар күрүне инспекторлары Кызыл хоорайның чурттакчыларынга Крещение байырлалында сугже кирер черни тодараткан. Ол чаңчыл ёзугаар чүгле Улуг-Хемниң Вавилин ээтпээниң девискээринде Кызылдан 5 км ыракта Кызыл – Кара-Хаак оруунуң дужунга болур. Ында доштуң кылыны 70 см, сугнуң ханызы 1 метр 50 см, агым чок, турум чер.
Орукка хөртүктер турбазы-биле грейдерлер ынаар угландыр ажылын чорудуп эгелей берген. Ыдыктыг арыглаашкын байырлалында тускай машина турар черлерни база аңгылаар. Январь 18-те 22.00 шактан 12.00 шакка чедир чон аргыштырылгазын база организастаары көрдүнген. Ол ышкаш ойган дош чанынга чылынмышаан, изиг шай ижип ап болур пунктуну ажыдар. Чоннуң айыыл чок чоруун хандырары-биле эжиндириишкин кылыр черге дүрген дуза кадар албан болгаш ОБЯ ажылдакчылары хондур дежурныйлаар.
Православ чүдүлгеде январь 6-дан 19-ка чедир тускай үе бар — Рождество сочельниги. Ол ыдыктыг үеде чүдүкчүлер Рождествону болгаш чырык черже Иисус Христосту чоруткан Ыдыктыг бурганга мөгеер ужурлуг. Албан чаңгыс-даа болза мөргүлге олуруп алырга, эки салдарлыг. Ол ышкаш өске кижилерге ачы-дуза чедирип, чаштарга белек-селек сөңнеп, база ол ышкаш энелерге дузалажырга, улуг ачы-буянныг.
Ыдыктыг хүннер январь 19-та Крещение-биле доостур. Православ чүдүкчүлер чаңчыл ёзугаар дошта крест дүрзүлүг кылдыр ойган сугже шымнып кирерлер. Ыдыктаан суг кижини бүрүнү-биле багай кылдыныглардан арыглаар, айызаар ёзулал. Январь 18-тен 19 дүнезинде православ хүрээлерге бурганга улуг номнал өргүлүнүң соонда сугну ыдыктап, айызаар.
Олча ОНДАР.
Чурукту интернет четкизинден алган.
«Шын» №1 2025 чылдың январь 16