АППАРАТ ХУРАЛЫ
Дүүн Тываның Чазак бажыңынга Аппарат хуралы болуп эрткен. Аңаа байырлал хүннеринде болган болуушкуннарның дугайында чугаалашкан.
ТР-ниң Баштыңы Владислав Ховалыгның демдеглээни-биле алырга, 2024 чылды уткаан байыралал хүннери эрткен чылга деңнээрге, кем-херек үүлгедиишкиннериниң талазы-биле чүгээр болган. Эрткен 2023 чылдың эгезинде байырлал хүннеринде республика девискээринге 68 кем-херек үүлгедиишкини бүрүткеттинген, оларның 20-зи аар кем-херекке онаажыр болган болза, а 2024 чылдың дыштаныр хонуктарында 32 кем-херек үүлгедиишкини бүрүткеттинген. Оларның тозу аар кем-херекке онаажыр.
«Бичии-даа болза түңнел бар, ынчалза-даа үстүнде кирген саннарның артында кижилерниң салым-чолу турар деп чүвени сагындырайн. Ылаңгыя Кызыл хоорай биле Барыын-Хемчик кожуунга болган өлүрүүшкүннер аңаа хамааржыр. Ийи кем-херек үүлгедиишкиннерин кайызын-даа ооң мурнунда хосталгазын казып, шииттирип чораан хамаатылар үүлгеткен. Моон соңгаар ындыг үүлгедиглер болдурбазы-биле, болуушкун бүрүзүн сайгарып, чугаалажыры чугула.
Назы четпээннерниң киржилгези-биле кем-херек үүлгедиишкиннери бо удаада болбаан дээрзин демдеглээш, баш бурунгаар профилактиктиг ажылдар чорудулгазы эки болганын сагындырайн. Бичии уруглар болгаш элээдилер бөлгүмнерже болгаш спортче хаара туттунган турган. Кожууннарга культура болгаш спортчу хемчеглерни тус черниң ажылдакчылары организастаан. Комиссия кежигүннери учетта турар өг-бүлелерниң бажыңнарынга чедип, хыналданы хүн бүрүде чорудуп турган. Чазак кежигүннериниң дыштанып келген студентилер-биле ужуражылгалары база рольду ойнаан деп санаар мен»– деп, ТР-ниң Баштыңы В. Ховалыг чугаалаан.
Бистиң корр.
«Шын» №1 2024 чылдың январь 10
