Россияда «Госуслуги» портал таварыштыр бирги классче кирер уругларны бижидер билдириишкиннер киирериниң ийиги «чалгыы» эгелээн. Ол дээрге быжыглаттынган школазының девискээринде чурттавайн турар уругларга хамааржыр.
Уругну бирги классче «Госуслуги» портал таварыштыр канчаар бижидериниң дугайында Кызылдың Ч.Н. Хомушку аттыг 16 дугаар лицейиниң директору Альберт Дапылдай тайылбырны берген.
Ооң чугаазы-биле алырга, ажы-төлүн школаже киирер үе ада-иелерде ам-даа бар. «Бирги классче бижидериниң ийиги чалгыы июль 6-дан эгелээн. Школаның девискээринде быжыглаттынмаан уругларны хүлээр үе-дир. Билдириишкинни «Госуслуги» портал таварыштыр киирип болур.
Бирги классче уруун хүлээп алырының дугайында билдириишкин киирер ада-ие Госуслуги порталында бүрүткелдиг турар ужурлуг. Электроннуг форманы долдургаш, билдириишкинни хүлээп алган деп шынзылганы алган турар.
Уругну бирги классче хүлээп алган деп актыны школа бериптерге, хүлээп алган деп дыңнадыг хуу кабинединге чедип келир. Билдириишкин киирер хуусаа сентябрь 5-ке чедер» – деп, лицейниң директору медеглээн.
Бистиң корр.
Чурукту интернет четкизинден алган.