Тываның найысылалының чоогунда бок аңгылаар комплекс тудуун май айда эгелээр. Республиканың Баштыңы Владислав Ховалыг ооң кол инвестору «Россияның экологтуг оператору» компанияның чиңгине директору Денис Буцаев-биле төлевилелди боттандырарының айтырыгларын чугаалашкан.
«Амгы үеде Төп күрүнениң экспертизазы төлевилел-смета документилерин сайгарып турарын Денис Петровичиге чугаалаан мен. Санал-оналдарны дораан шиитпирлеп тур бис. Чоокку үеде ооң түңнелин алыр боор бис. Инвестиция төлевилелин акшаландырарының аргаларын көрдүвүс» – деп, Тываның Баштыңы бодунуң блогунда дыңнаткан.
Төлевилелдиң документациязын хынаар ажылдар төлевилелди боттандырарының эң чугула чадаларының бирээзи болур. Ооң сорулгазы – төлевилелдиң шупту негелделеринге болгаш нормаларынга дүгжүп турарын хынаар, частырыгларны илередип чайладыр. Ол материалдарның болгаш ажылдың өртээн эвээжедиринге, тудуг үезинде кижилерниң айыыл чок чоруун хандырарынга болгаш объектини ажылдадырынга дузалаар.
Бир эвес бокту аңгылаар комплекс төлевилели эксперттерниң эки дээн түңнелин апса, республика тудугну эгелеп болурунга чөпшээрел алыры артар. Ажылды “ТСП” компанияның тургусканы Тывада коммунал боктар-биле бүгү ажылдарны харыылап турар «ВторЭкоПром» КХН кылыр. “ВторЭкоПром” төлевилелде ээзи кылдыр киржип турар болгаш, 2026 чылда тудуг доосту бээрге, дараазында 22 чылда комплексти удуртуп-башкарар.
2025 чылда эгелээн «Экологтуг чаагай чорук» национал төлевилелге Тыва киржип эгелээш, завод тудар арганы алганын сагындыраал. Тудугнуң өртээ 3,1 млрд рубль деп санаан. Заводтуң күчү-күжү чылда 70 муң тонна бокту болбаазырадыр, ол ышкаш 100 муң хире тонна бокту чок кылып, шыгжаар.
Бокту аңгылаарындан аңгыда, ыяш, кеш, резина, чук, саазын, картон, пөс аймаа болгаш пластик дээш өрттенир боктардан RDF одаар чүүл бүдүрер шугумну комплекске ажыдар. Котельнаялар болгаш чылыдылга станциялары бо одаар чүүлдү хөмүр-даш орнунга ажыглап болур. Эвээш дизе, 10,5 муң тонна үүрмектээн одаар чүүл бүдүрери планнаттынган.
А. МОНГУШ.
Чурукту интернеттен алган.
“Шын” №10 2025 чылдың март 20
