Бо чылын Тывага алды школага капиталдыг септелге планнаттынган. Бо хүнде чамдык өөредилге черлеринде чаартылга ажылдары эгелей берген. Сентябрь 1-де шупту объектилерде ажылдар доостур ужурлуг.
Бүгү негелделерге болгаш амгы үениң стандарттарынга школаларның дүгжүрү, бедик шынарлыг өөредилге программазы-биле хандырары – Тываның Баштыңы Владислав Ховалыгның салган үндезин сорулгаларының бирээзи.
Сүт-Хөл кожууннуң БораТайга школазында 96 өөреникчилиг 11 класс бар. Ында 28 башкы болгаш өске ажылдарже хаара туттунган 27 кижи бар.
Капиталдыг септелге үезинде өөредилге чорудуун болгаш изиг чемни санитарлыг нормаларга дүүштүр уругларга чорудуп турар. Оон аңгыда, чаартылга ажылдарын хайгаараар аңгы кижилерни томуйлаан дээрзин Бора-Тайга школазының директору Ай-кыс Ховалыг демдеглээн.
Амгы үеде шалаларны болгаш эрги чылыдылга системазын бузар ажылдар доозулган. Төлевилелде Кызыл, Чөөн-Хемчик, Чаа-Хөл база Сүт-Хөл кожууннардан дөрт тудуг бригадазы киржип турар, ниитизи-биле 40 ажыг ажылчыннар хаара туттунган. «Депшилге» деп тудуг организациязы-биле керээни чарган.
“Дээвиирлер шупту кылдынган. Чаа чылыдылга системазын тургузар ажылдар кидин түлүк. Сериниң чаартылгазы барык доозулган”— деп, хүлээникчи организацияның ажылчыны Шолбан Моңгуш чугаалаан.
Ажылды август ортан үезинде доозары планнаттынган. А тус черниң школачыларынга чаа өөредилге чылы чаарттынган чараш, чырык оран-савадан эгелээр. Ниитизи-биле республикада, Бора-Тайга ортумак школазындан аңгыда, капиталдыг септелге ажылдары 5 объектиде чоруп турар. Ол дээрге Кызыл кожууннуң Борбак-оол Араптан аттыг Сукпак ортумак школазы, Чеди-Хөл кожууннуң Хову-Аксы суурда өөредилге чери, ол ышкаш Тес-Хемниң Чыргалаңдыда, Барыын-Хемчиктиң Аксы-Барлыкта болгаш Бай-Тайганың Кызыл-Дагда школалар.
О. АК-ООЛ белеткээн.
“Шын” №17 2025 чылдың май 8
