Тере-Хөл кожууннуң хөйге билдингир турисчи ылгавыр демдектери – Пор-Бажың шивээзи база Тарыс аржааны.
Тус черниң чурттакчылары кадыкшылын экижидип алыры-биле, каас-чараш бойдус чурумалдыг черде «Бояй» аржаанынче чыл санында чедип, чүрек-дамыр, сөөк-даяк, карак, аллергия, ижин-хырын аарыгларындан эмнедип ап турар.
Хууда сайгарлыкчы Марат Монгуш эм шынарлыг аржаанның девискээрин 49 чылга хөлезиге алгаш, дыштаныкчыларга таарымчалыг байдалды тургузуп, чаагайжыдып турар. Ол дөрт өрээлдиг үш бажыңны бодунуң күжү-биле туткан. Аржаанның девискээринде бажыңнарны хөлезилээрге, төлевири 500 рубль.
Эм шынарлыг аржаанче киргени дээш дыштаныкчылар 500 рубль дадывырны төлеп турар. Ук акша-хөреңгини девискээрни чаагайжыдарынче, үндүрүг төлевирлеринче, бок үндүр сөөртүрүнче, оттулар ыяш белеткээринче, аржаанчыларның байырлалын эрттиреринче угландырып турар.
Ол ышкаш дыштаныкчылар спутник таварыштыр интернетке халас коштунуп ап, хүнден октаг алыр батареялардан телефоннарын «чемгерип» алыр аргалыг.
– Чылдың-на аржаанчылар байырлалында хүреш, панчык, хол бөмбүү, кыс улуска сумога маргылдааларны эрттирип турар бис. Аржаан сезону июль 5-тен эгелээш, август 20-де доостур. Тус черниң чурттакчыларындан аңгыда, мында Эрзин, Нарын, Качык, Чадаанадан база улус бар.
Аржаанга кирер дээн улустуң солуттунар эргижирээн черин чоорту чаартып, арыгланып-аштаныр черлерин немей тудуп, бажыңнарның иштики септелгезин чорудар – деп, хууда сайгарлыкчының дузалакчызы Алена Бегзи дыңнаткан.
«Ойна» алдын тывыш артели деткикчилеп, ук аржаанның девискээринде дыштаныкчыларга беш бажыңны туткан.
Ш. Ховалыг.