Буян Ооржак херел-биле чондурар база суй белектер кылыр талазы-биле мастерскаяның ээзи. Ол графиктиг чурулга адырында 14 чыл дургузунда чедиишкинниг ажылдап чоруур. Бо чылдарның дургузунда ооң бүдүрүп турары продукциязы улус-чоннуң ортузунда таныттынгыр апарган.
Эрткен чылын Буян социал керээниң киржикчизи апарып, бодунуң херээнге чаа-чаа ажыдыышкыннарны кылган. Күрүнеден алганы субсидия барааннарның болгаш ачы-дузаның хевирлерин көскүзү-биле калбартыр арганы берген.
«Деткимчениң акша-төгериинге чайырлаар машинканы болгаш өске-даа дериг-херекселдерни садып алдым, а ол ышкаш мастерскаяга агаарладылга системазын эптеп алдым. Меңээ, арга-дуржулгалыг ус-шеверге безин, ук деткимче көскү дузаны чедирди, а бодунуң ажыл-херээн чаа-ла чогудуп чоруур кижилерниң дугайында чугаалаан-даа ажыы чок боор» — деп, ол чугаалады.
Ол чагыг бүрүзүнге тускай хамаарылгалыг. Буянның бүдүрүп турары продукция калбак хевирнии, ат-сывын бижээн самбыралар, суй белек хааржакчыгаштары, медальдар, дугаарлар, хүндүлел бижиктер, өөрүп четтириишкиннер, суй белектер болгаш сорунзалар. Чылдың үелериниң аайы-биле продукцияның хевирлери өскерлип турар: кудалар үезинде куда-дой бижиктери онза нептереңгей, спартакиадалар үезинде — чаңгыс аай футболкалар дээш оон-даа өске.
ТР-ниң Чонну ажылга хаара тудар төптүң медээзи-биле.
Чуруктарны интернет четкизинден хоолгалаан.
«Шын» №69 2024 чылдың сентябрь 11
