Тыва журналистикага 1969 чылдан бөгүнге чедир, ол болза 55 чыл, бараан болдум. Ол үеде көрбээн чүвем-даа чок, көдүрбээн хөнээм-даа чок. Хар-назыным чеже-даа улгаткан, кадыкшылым чегей-даа болза, найысылалда болуп турар болуушкуннардан чыдып калбайн, журналист демдеглелдерни бижип турар мен.
«Хоочун коктуг» дээр Кызыл хоорайның идепкейлиг улуг назылыг хоочуннары Чаа чыл бүдүүзүнде «Ырлажыылам» деп мөөрейни эрттирген. Аңаа 65-тен 85 харга чедир ыраажылар киришкен. Мөөрей үезинде тыва литератураның үндезилекчилери Степан Сарыг-оолдуң, Салим Сүрүң-оолдуң, Светлана Козлованың, композиторлардан А.Б. Чыргал-оолдуң, Саая Бюрбээниң, Р.Д. Кенденбильдиң, Алексей Хуурактың база орус композиторларның ырылары чаңгыланган.
Мөөрейге ниитизи-биле 18 ыраажы киришкен. Оларның аразындан 85 харлыг Таңды кожууннуң сураглыг ыраажызы Кызыл-оол Самбууевичини демдеглекседим. Ооң «Межегей» деп ырызы-биле мөөрейни эгелээн. Ол ышкаш Люсьена Шаңгыйлановна биле Анатолий Оюнович Токаш-оолдарны, өткүт үннүг Наталья Очурну, хоюг, тааланчыг үннүг Валентина Максимовна Килченни, Надежда Торлуковна Оюнну, Надежда Казаковна Дамбылды жюри онзалап демдеглээн.
Шыңгыы жюриниң түңнели-биле тиилекчилер илереттинген. Доржу Монгушевич Ак-кыс «Чес-Булуң» деп ырыны күүсеткеш, бирги черге төлептиг болган. Ийиги черни Светлана Кыргысовна Сумучу «Поговори со мною, мама» деп ырызы-биле, үшкү черни Борис Дииспеевич Ооржак Салим Сүрүң-оолдуң сөзүнге, аялгазы Ростислав Кенденбильдиң «Сылдыс» деп ырызы-биле тиилелгени чедип алган.
Өткүт үннүг ыраажылар-биле кады көрүкчүлерниң хей-аъды көдүрлүп, ырлажып, танцылап хөглээннер.
База катап Чаа чыл-биле эргим өңнүктер!
Светлана ДАНЗЫН-ООЛ,
Тыва Республиканың алдарлыг журнализи.
«Шын» №1 2025 чылдың январь 16