Бо чылдың төнчүзүнге чедир Тываның 6 суурунга фельдшер-акушер пунктулары (ФАП) болгаш амбулаторлуг эмнелгелер немежир. Чаа эмнелге объектилерин Чеди-Хөл кожууннуң Ак-Талга, Кызыл кожууннуң Терлиг-Хая болгаш Баян-Колга, Каа-Хем кожууннуң Кундустугга база Улуг-Хемниң Арыг-Үзүү болгаш Хайыраканга тургузар.
Кадык камгалалының бирги чадазын чаартыры деп регионалдыг программаның ачызында бо суурларның чурттакчылары таарымчалыг байдалга эмчи дузазын алыр аргалыг болур.
Эмнелге объектилериниң тудуунче 70 569,75 муң рубль көрдүнген.
Терлиг-Хая болгаш Хайыракан суурларда тудуг ажылдарын «Сылдыс» КХН кылып эгелээн. Тудугну график езугаар чорудуп турар. Амгы үеде Терлиг-Хая суурда ФАП-тың, Хайыраканда амбулаторлуг эмнелгениң ханаларын шынарлыг материал-биле тудуп үндүрген. Тудугжулар ам серизин кылыр болгаш бажыңны дескиндир бетон-биле шывар, ол ышкаш септик тургузар ажылдарны эгелээн.
Эмнелге пунктулары тудар өске суурларда тудуг ажылдары эге чадада: чер девискээрлерниң планын тургузар, геолог-геодезия ажылдары дээш оон-даа өске.
Кадык камгалалының бирги чадазын чаартыры деп программа болгаш «Кадык камгалалы» национал төлевилел-биле Тывага сөөлгү ийи чылда көдээ черлерге 30 ажыг эмнелге объектилери туттунган.
Бистиң корр.
Чурукту интернет четкизинден алган.
Чаа эмнелге объектилери немежир. / Кадык камгалалы.
25 июня 2022
50