Кызыл хоорайның оң талакы кезээнде, Вавилин ээтпээ микрорайонда Ада-чурттуң Маадырлары аттыг 20 дугаарлыг чаа школа өөреникчилерин чаа өөредилге чылында хүлээп алырынга белен. Ам ол кезектиң өөреникчилери өөренир дээш ырадыр чоруп турбас апаар.
Чаа школаның директорунда «Эң эки эр лидер башкы болгаш дагдыныкчы» мөөрейниң тиилекчизи, салгал дамчаан башкыларның төлээзи Денис Попугаловту томуйлаан. Ооң удуртулгазы-биле школа уругларның бүгү талалыг сайзыралынга таарымчалыг байдалдарны тургузарын кызып турар.
Бо хүнге чедир школаже 895 уруг бижиткен. «Өөредилге» национал төлевилел боттанылгазы-биле өөредилге черин туткан. «Чаа өөредилге чылынга белеткел адакталган. Кызылдың Вавилин ээтпээнде Ада-чурттуң Маадырлары аттыг чаа школа өөреникчилерин манап турар. Президентиниң «Өөредилге» национал төлевилели-биле туткан 825 олуттуг өөредилге черинге бөгүн чордум» — деп, Тываның Баштыңы Владислав Ховалыг бодунуң блогунда бижээн.
Владислав Ховалыг оон аңгыда Таңды кожууннуң Балгазын суурунуң улуг, бичии чурттакчыларының четтикпейн манааны чаа школага база чораанын дыңнаткан. Эргижирээн айыылдыг школаның орнунга 616 олуттуг чаа оран-саваны туткан.
Республикада ам-даа чеди школаны тудуп турарын сагындыраал.
А. МОНГУШ.
“Шын” №65 2024 чылдың август 28
