Республиканың төөгүзүнде бир-ле дугаар өөредилге адырында көскү чаартылгалар чоруп турар. Чаа школалар туттунуп, өөредилгениң бар албан черлериниң оран-савазының үндезин септелгези калбарган. Бо хүннерде Тываның девискээринде «Өөредилге» национал төлевилелдиң деткимчези-биле 8 чаа школаның тудуу кидин түлүк чоруп турар.
Июль 29-та ТР-ниң Дээди Хуралының депутаттары Кызыл хоорайда чаа тудуп турар школаларның тудуунга чедип, хыналданы чоруткан. Вавилин ээтпээнде чаа школа 2024 чылдың сентябрь 1-ден эгелээш, уругларны хүлээп эгелээр. Школаның директору Денис Попугалов тудуг ажылдарын таныштырган.
«Кызыл хоорайның 20 дугаарлыг школазының тудуунуң 90 хуузу болган. Сигнализация, видеохайгаарал салдырары дээн ышкаш ажылдар арткан. Бо школа 825 олуттуг. Кызыл хоорайда чоокта чаа туттунган чаа школалар дег, шак-ла ындыг проектилиг школа болуп турар. Амгы үеде юридиктиг айтырыгларын шиитпирлеп турар. Школага ажылдаар коллектив колдуу четчеленген. Ынчалза-даа ам-даа чедер-четпестер бар. Бо школа Ада-чурт камгалакчызы деп атты эдилээр.
Ажы-төлүн бо школаже киирер дээн ада-иелер база үзүк-соксаал чок кээп тур. Оларның аразында тус черниң чурттакчылары-даа бар, бажың тудуп алгаш, кожууннардан көжүп кээп турар-даа улус бар. Школага өөренири-биле бүрүткеткен өөреникчилерниң саны муң ажа берген» – деп, Денис Попугалов чугаалады.
ТР-ниң Дээди Хуралының депутады, Роман Поманисочкин:
– Бөгүн бис ТР-ниң Дээди Хуралының депутаттары чаа туттунуп турар школаларның тудуунче ээлчеглиг үнүүшкүннү кылдывыс. Вавилин ээтпээнде 20 дугаарлыг школага кээривиске, ажыл колдуу адакталган болду. Амгы үеде школага ажылдаар башкыларны четчелеп турар-дыр. Школа делгем, арыг-силиг, амгы үениң негелделеринге дүгжүп турар, чараш-тыр.
«Ажылдың түңнели көстүп турар-дыр. Башкы кижиге меңээ улуг, делгем класстар, спортчу залдар, долу дерилгелиг кабинеттерни көөрге, дыка өөрүнчүг-дүр. Шупту чүвени октапкаш, маңаа кээп ажылдаксаам кээр-дир. Күш-шыдал үезинде карааның оду хып турар аныяк директорну көөрге, сагыш-сеткилге өөрүнчүг-дүр. Тывада амгы үениң дериг-херексели-биле дериттинген улуг чырык школаларны тудуп эгелээни дээш Чазак Даргазынга өөрүп четтиргенимни илередир-дир мен. Ам-на ажы-төлүвүс, негелде езугаар туттунган чылыг, чырык, делгем школага өөренир аас-кежиктиг болган-дыр»– деп, ТР-ниң Дээди Хуралының депутады Аяна Моңгуш чугаалады.
«Кызылда туттунуп турар ийи школага бардым. Вавилин ээтпээнде школа кончуг улуг өргээ чорду. Кады чораан эштеримден чыдып калгаш, аза бердим. Кайгамчык чараш, улуг, делгем, чырык школаны тудуп доозупканынга өөрбестиң аргазы чок. Ажы-төлүвүс шак мындыг школага өөренирге, оларны «чырык» келир үе манап турар дээрзи чугаажок» – деп, Голевтиң даг-руда компаниязының директорунуң оралакчызы, Андрей Листков чугаалады.
Дараазында «Спутник» микрорайонунда тудуп турар школага бардывыс. Бо ийи школа кайызы-даа 825 олуттуг. Кайызының-даа төлевилел-сметалыг документациязын «Авангард» компаниязы кылган.
2022 чылда «Спутник» микрорайонунда чаа школаның таваа салдынган. Керээде айытканы болза, 2024 чылдың декабрьда тудугну хүлээдир ужурлуг. Баш удур санааны-биле алырга, декабрьга четпейн, күске чедир доозуптар магадылал бар.
Айдың ОНДАР.
Буян ООРЖАКТЫҢ тырттырган чуруу.
"Шын" №57 2024 чылдың июль 31
