Тываның девискээринде чаа школалар туттунуп, уруг-дарыгга таарымчалыг байдалдарга болгаш амгы үениң дериг-херекселдери-биле дериттинген оран-савага быжыг билигни бээри-биле ажылдар чоруттунуп турар. Ол дугайында Тываның Баштыңы Владислав Ховалыг демдеглээн.
«Тывада 8 чаа өөредилге албан черлериниң тудуу уламчылап турар. Чаа школаларның тудуглары — суурларда болгаш Кызыл кожууннуң девискээринде. Уруглар таарымчалыг байдалдарга болгаш амгы үениң дериг-херекселдери-биле дериттинген школаларга өөренири-биле бүгү ажылдарны кылып турар бис.
Амгы үеде Тывада 173 школа бар. Ында 72 муң уруг өөренип турар. Россияда чаш уругларның төрүттүнери-биле эң-не бедик көргүзүглүг регион болганывыста, чурттуң Президентизинден болгаш федералдыг Чазактан социал инфраструктураны экижидер талазы-биле улуг деткимчени ап турар бис.
ТАР-ның Совет Эвилелинге эки тура-биле каттышканындан бээр 80 чыл оюн таварыштыр солун чүүлдерни сактып болур. Чижээлээрге, улус өөредилгезиниң тургустунган төөгүзү. 1944 чылда республикага 122 школага 8,5 муң уруг өөренип турган. Ооң-биле чергелештир школа барбайн турган уругларның саны хөй– 12,5 муң. 1960 чылдарның эгезинде байдал долузу-биле өскерилген. Школалар саны 167 четкен. Өөреникчилерниң саны – 35,3 муң уруг. Дайын чылдарының соонда, берге үелер-даа турза, чаа обласка ниити өөредилге системазының хөгжүлдезинче хөй түңнүг акшаландырыышкынны үндүрүп турган» — деп, регионнуң Баштыңы дыңнаткан
Бистиң корр.
Чиңгис СААЯНЫҢ тырттырган чуруктары.
“Шын” № 45 2024 чылдың июнь 19
