Март 7-де В. Көк-оол аттыг Национал хөгжүм-шии театрынга Бүгү-делегейниң херээженнер хүнүнге тураскааткан Чазактың байырлыг концерти болган.
Аңаа Тываның Чазак Даргазының мурнундан ТР-ниң культура сайыды Виктор Чигжит сөс алгаш, частың чараш байырлалы – Март 8-биле Тываның бүгү херээжен чонунга, аваларга, кырган-аваларга изиг байыр чедирип, кадыкшылды, бүгү-ле чүүлдерге экини күзээн. Ол ышкаш байыр чедириишкининге онза кичээнгейни хөй ажы-төлдүг аваларже угландырып, оларның ажы-төлге ынак уян сеткили кезээде мактанчыг дээрзин демдеглеп, ТШО-да киржип турар экер-эрес маадырларны кижизидип өстүрген аваларга мөгейип, четтиргенин илереткен.
Байыр чедириишкининиң соонда ТР-ниң Чазак Даргазының даалгазы-биле Виктор Чигжит ажыл-агыйның аңгы-аңгы адырларында ажылдап чоруур мурнакчы аваларга күрүне шаңналдарын тывыскан:
ТР-ниң Чазак Даргазының Өөрүп четтириишкин бижиин Долаана Монгушка, Розалия Орус-оолга, Снежана Иргитке тывыскан.
ТР-ниң Чазак Даргазының Хүндүлел бижии-биле Өвүр кожуундан Уран Дагба шаңнаткан.
“Тыва Республиканың кадык камгалалының алдарлыг ажылдакчызы” атты “Аэропорт Кызыл” Федералдыг бүдүрүлгениң фельдшери Людмила Величкога, ТР-ниң кадык камгалалының хоочуну Саяна Кара-Салга;
“Тыва Республиканың алдарлыг ажылдакчызы” атты “Кызылдың арга-арыг ажыл-агыйы” күрүне албан чериниң директору Саида Монгуш-Торэге;
“Тыва Республиканың өөредилгезиниң алдарлыг ажылдакчызы” атты Хову-Аксы ортумак школазының орус дыл болгаш литература башкызы Ольга Енушкевичиге;
“Тыва Республиканың уран чүүлүнүң алдарлыг ажылдакчызы” атты А.Б. Чыргал- оол аттыг Кызылдың уран чүүл колледжиниң директору Айлаңмаа Каң-оолга;
“Тыва Республиканың улустуң башкызы” атты Кызылдың 17 дугаарлыг школазының социал педагогу Раиса Ондарга тывыскан.
“Буян-Бадыргы орденниң” III чергези-биле ТР-ниң кадык камгалалының хоочуну Зоя Бадыргыны шаңнаан.
Шаңналдар соонда республиканың билдингир артистери, чогаадыкчы коллективтериниң солун концерти кежээни уламчылаан.
Бо чылын чарлаттынган Өг-бүле чылында кол черни авалар ойнаар, келир үениң төлептиг салгалын кижизидеринге оларның ролю канчаар-даа аажок улуг дээрзин база ниитилелдиң быжыг өзээн база-ла авалар тургузуп турарын чарлакчылар сагындырып, тааланчыг чараш сөстерни харам чокка чугаалап турганнар.
Кажан-даа, кандыг-даа үеде херээженнер эң-не чараш, херээженнер эң-не эргим, херээженнер эң-не мерген угаанныг. Оларның аразында эң-не чараш кижи – чаш уруг туткан ава! Авалар – өртемчейниң чырыткызы, делегейниң чечектери дээш мактал сөстерин шуптузун аваларга сөңнеп, оларны алгап-мактаан, алдаржыткан ыр-шоор концертке чаңгыланган.
Сорунза МОНГУШ.
Авторнуң тырттырган чуруктары.
«ШЫН» №18 2024 чылдың март 9
