ТАЙЫЛБЫРЛАР
Чиигелделиг ипотека дугайында улустуң сонуургап турар азы соора билип турар айтырыгларынга дараазында тайылбырны бээр-дир бис.
Тывага чиигелделиг ипотека алырда, Кызыл хоорайга киир бижидилгелиг болуру албан деп чамдык улус бодап турар.
Чок, ол ындыг эвес. Ынчалза-даа 2 хуулуг ипотека программазы-биле чурттаар оран-саваны чүгле Тывада чаа туттунуп турар бажыңнардан садып ап болур. Киир бижидилге ипотека алырынга роль ойнавас.
Бир эвес бодунуң адында чурттаар оран-сава документизи бар болза, 2 хуулуг ипотека алыры болдунмас.
Чок, бо көңгүс шын эвес бодал-дыр. Чиигелделиг ипотека алыр кижиниң бажыңының бар-чогу хамаанчок. Ипотеканы эрттирип алгаш, ай санында төлеп шыдаар-ла болза, чиигелделиг ипотеканы хамааты бүрүзү алыр эргелиг.
Чиигелделиг ипотека эрттирер-эрттирбезин хынаарда, банкыже баары албан.
Чиигелделиг ипотека эрттирерде, документилерин тудуп алгаш, банкыже баары албан эвес. Эң-не баштай онлайн хевирге чагыгны Росбанк азы Сбербанкыже чорудуп болур. Киирген чагыының харыызы келирге, ынчан документилерин чыып алгаш, банкыга чеде бээр.
САГЫНДЫРЫГ:
- Чиигелделиг ипотека-биле чүгле чаа туттунуп турар бажыңнардан квартира садып ап болур.
- Садып ап турар бажыңының өртээ 6 сая рубльден көвүдевес ужурлуг.
- Ипотеканы төлээр хуусаазы 20 чылдан көвүдевес.
- Чээлини ап турда, баштайгы төлевир 15,4 хуудан эвээжевес ужурлуг.
- Баштайгы төлевирге ие капиталын ажыглап болур.
- Чиигелделиг ипотека программазы 2024 чылдың июнь 30-ге чедер.
- Чиигелделиг ипотека программазының деткимчезин алыр дээш, Тываның Чазаа ийи чыл дургузунда чогуур ажылдарны чорудуп келген түңнелинде, 2023 чылдың июль айда Россияның Чазааның Даргазы Михаил Мишустин доктаалга адын салган.
Айдың ОНДАР
“Шын” № 85 2023 чылдың ноябрь 8