«Хандагайты» кызыгаар-эрттирилге пунктузунда Россияныӊ каайлы албаныныӊ, көдээ ажыл-агый хайгааралыныӊ ажылдакчылары доктаамал ажылдап турар.
Россияныӊ бир хамаатызы июнь айныӊ төнчүзүнде кандыг-даа ветеринария документилери чокка, 10 кил хой дүгүн ап алгаш, Моолче киирер деп турган. Үстүнде айыткан күрүне албан чериниӊ ажылдакчылары чуӊгактыг хой дүгүн күрүне кызыгаарындан үндүрерин чөпшээревээн. Чүге дизе дириг амытаннарныӊ эът-сүт, кеш-дүк барааннарын Евразияныӊ экономиктиг эвилелиниӊ девискээринче дажыглаарыныӊ тускай чуруму бар. Хой дүгүн ап чораан кижиге ветеринария хыналдазыныӊ чурумун тайылбырлап бергеш, дүктү Россияныӊ девискээринче катап эгиткен.
Ветеринария дүрүмүн сагываан кижиге хамаарыштыр РФ-тиӊ Административтиг эрге-хоойлу хажыдар чоруктар дугайында дүрүмүнүӊ (КоАП РФ) 10.6 чүүлүнүӊ 1-ги кезээ-биле административтиг херекти оттурган.
Дириг амытаннарныӊ эът-сүт, кеш-дүк барааннарын кызыгаардан эрттирериниӊ негелделерин сагывайн баары – ветеринария хыналдазыныӊ талазы-биле нептереӊгей болуушкун апарган.
Делегей чурттарыныӊ болгаш Россияныӊ ветеринария талазы-биле эрге-хоойлу актыларыныӊ негелделерин Федералдыг ветеринария болгаш фитосанитария хайгаарал албаныныӊ сайтызында бижээн. Даштыкы чурт баарда, бодунга азы ап чоруур чүъгүнге суп болур-болбас чүүлдер дугайында баш бурунгаар номчуп билип алыр.
Өске улустуӊ чагаа-хораазын, бичии-даа чүъгүн кызыгаар-эрттирилге пунктузундан эрттирип бээринге чөпшээрешпес ужурлуг. Бир эвес чогуур негелделерни, дүрүмнерни шын сагыыр болза, күрүне кызыгаарындан аргыжары дүвүренчиг болбас.
Тыва, Хакас республикаларда болгаш Кемерово областа — Кузбасста эргелелиниӊ медээзи-биле
Медээлерни Р. ДЕМЧИК белеткээн.
“Шын” №47 2023 чылдың июнь 28