Россияның Чурагайлыг сайзырал, харылзаа болгаш массалыг харылзажылга яамызы, Россияның Чырыдыышкын яамызы, «Чурагайлыг экономика» АКН болгаш информастыг технологиялар хүрээлеңинде кол российжи компаниялар демнежип алгаш, уругларның чайгы дыштанылга лагерьлеринге «Чурагай хүнү» деп информастыг технологиялар талазы-биле билиг бээр төлевилелди ажылдадыр деп турар.
Ук төлевилел чайгы үеде өөреникчилерниң эрте профориентациязынче угландырган болгаш уругларның лагерьлерьге дыштанылгазының үезинде сурагжаан информастыг технолгиялар адырында профессияларже, онза чугула информастыг технологиялар-биле оюн хевирлиг таныштырылга аргазын тургузуп турар. Сонуурганчыг квест-оюн «Чурагай кичээли» деп төлевилелдиң материалдарындан үндезилеп кылдынган. Ону «Чурагайлыг экономика» организациязы Россияның кол информастыг технологиялар компаниялары-биле ажылдап кылган. Оларның аразында Яндекс, «Касперскийниң лабораториязы», «1С» фирма, күрүнениң корпорациязы «Росатом», VK болгаш «Келир үеже салыышкын» деп Сберниң ачы-дуза фондузунуң өөреникчилерге кылымал интеллект Академиязы кирип турар.
«Чурагай хүнүнүң» программазы чаңгыс лагерь хүнүнүң дургузунда эртер болгаш каш аңгы чадалардан тургустунган. Баштай уруглар командаларга чарлып алгаш, вожатый-биле кады айтырыгларга харыылаар солун квест-оюнну эртер. Оон практиктиг билиглерни ажыглап тургаш, «келир үениң чурагайлыг лагерин» тудар. Оюнну доозуп тура, интеллектуалдыг квизке киржип, хүннү түңнеп, үзел-бодалдары болгаш шиңгээдип алган билиглери-биле үлежирлер.
Лагерьлерге дээш ажылдап кылдынган халас методиктиг программаның иштинде сценарийлер болгаш оюннуң чадаларының хевирлериниң тайлбыры, башкыларга сүмелер, вожатый болгаш кижизидикчи башкыларга өөредиглиг видео-тайлбырлар, ол ышкаш уругларга тускай медиа-контент кирип турар. «Чурагай хүнүнге» немелде белеткел кылдыр май 25-те Москва шагы-биле 10.00 шактан 14.00 шакка чедир төлевилелдиң организакчылары болгаш методистери лагерь башкыларынга, вожатыйларынга вебинарны эрттирер.
«Чурагай хүнү» деп оюнну чылдың аңгы-аңгы үезинде даштыгаа азы аудиторияларга эрттирип болур. Ооң чада бүрүзүн үш аңгы (7-11, 12-15, 16-17 хар) назы-хар аайы-биле таарыштырган болгаш, лагерьниң шупту кижизидикчилери аңаа киржип болур аргалыг.
«Бистер өөредилге талазын идепкейлиг сайзырадып турар бис. Өөреникчилерге профориентациялыг акцияларны боттарывыс-даа, партнерлар-биле-даа эртирип турар бис. «Чурагай хүнүн» улуг өөрүшкү-биле деткиир бис, чүге дизе бедик технология компанияларының бо бот-идепкейижи эгелээшкини 2018 чылдан эгелеп «Чурагай кичээли» деп бүгү Россияның өөредиглиг акциязын таварыштыр өөреникчилерни чурагайлыг экономиканың аңгы-аңгы адырлары-биле таныштырып турар. Бо хүнде Россияда 19 394 хүндүскү болгаш стационарлыг лагерьлер бар. Оларның аразындан информастыг смена дыка эвээш, чүгле 290 хире» - деп, VK-ның университеттер-биле харылзаа талазы-биле директору Сергей Марданов демдеглеп турар.
