Тываның Баштыңы Владислав Ховалыг Тываның Чазаа биле Күрүне Эрмитажының аразында Дугуржулгага ат салганынга хамаарыштыр бодунуң бодалы-биле үлешкен.
«Делегейде эң-не улуг болгаш ат-сураглыг дээн музейлерниң бирээзи болур Күрүне Эрмитажы-биле кады ажылдажылга – Тывага бедик ат-алдар. Телекөвүрүг үезинде Тываның Чазаа биле Күрүне Эрмитажының аразында Дугуржулгага Михаил Борисович Пиотровский-биле атты салдывыс. Чинге-Тей I комплекизинден тывылган археологтуг тывыштар-биле ажылдаарының бүгү чурумун доктааттывыс. Бо чайын оон ызыгуурлуг скиф дайынчыны орнукшуткан базырык тывылган болгай.
Өртээ турбас эртиневисти кадагалап-шыгжаарының бүгү харыысалгазын медереп билип турар бис. Ынчангаш «Хааннар ыйгылаажының эртинелери» экспозицияны калбартырын планнап турар бис, чүге дизе, делгелгеде чамдык экспонаттар кирбейн турар. Чаа экспонаттар тывылганы-биле холбаштыр, алдын эдилелдер коллекциязын кадагалап, шыгжаарының айыыл чок чоруун хандырар байдалдарны тургузары-биле бүгү аргаларны дилеп, тывар бис.
«Аржаан» базырыктарын ажытканының ачызында Тываның сорунзалыы улам улгаткан. Михаил Борисович мээң чалаанымга харыы кылдыр республикага ыяавыла аалдап келирин аазады. Национал музейде скиф алдынының делгелгези, хөөрем чокка делегей чергелиг үнелиг эртине болуп, тоолчураан деп болур. А эң-не кол чүүл – чонувуска делегей чергелиг өнчүнүң кадагалакчылары бис деп медереп боданырынче хей-аът киирип турар» - деп, Владислав Ховалыг бодунуң социал четкилеринге бижээн.
