Июль айның 12-ниң хүнүнде байдал-биле алырга, Тываның арга-арыг девискээринге 6 өрт хып турган.
Тес-Хем кожууннуң арга-арыг ыяш ажыл-агыйының девискээринге хамааржыр, Шуурмак суурнуң чөөн талазынче 36 километр черде өрт хып турары июль айның 10-да кежээликтей илереттинген. Ооң ниити шөлү 7 га. Өрттүң хып үнген чылдагааны – чаңнык дүшкен. Өрттү өжүреринге 10 ажылдакчыны хаара туткан.
Улуг-Хем кожууннуң Шагаан-Арыг арга-арыг ажыл-агыйының Хайыракан участогунуң девискээринге хамааржыр, Эйлиг-Хем суурдан 17 километр ырак арга-арыгда өрт хып турары июль 10-нуң хүнүнде 16.00 шак үезинде илереттинген. Ниити шөлү 19 га өрт тарап хып, улам калбарып өрттенирин болдурбазынга болгаш өжүреринге 23 ажылдакчыны киириштирип, дөрт санныг техниканы ажыглаан. Арга-арыгга чаңнык дүшкенинден өрт хып үнген.
Каа-Хем арга-арыг ажыл-агыйының Сизим участогунуң девискээринге июль 10 – 11 хүннеринде өрттер хып үнгүлээн. Катазы деп чурттакчылыг черниң чөөн талазында арга-арыгның 10,5 га шөлдүг өрттүң июль 10-да, ол-ла чурттакчылыг черниң соңгу-чөөн талазында арга-арыгга 1,3 га черде өрттү июль 11-де Үжеп суурнуң чөөн талазында 14 километр черде арга-арыгга өрттү база-ла июль 11-ниң хүндүс тодараткан. Оларны өжүреринге ниитизи-биле 30 – 40 хире кижини болгаш техника аймаан хаара туткан.
Тожуда Доора-Хем суурнуң барыын талазында 10 километр черде арга-арыгга 1 га черде өрттү июль 11-де кежээ илереткеш, ону өжүреринге 10 ажылдакчыны хаара туткан болгаш 2 санныг техниканы ажыглаан.
Республиканың арга-арыг девискээриниң хайгааралын агаарга болгаш черге доктаамал чорудуп, хып үнген өрттерни өжүрер талазы-биле хемчеглерни дүрген ап турар. Өрттерни өжүреринге 135 кижи болгаш 120 санныг техника кезээде белен.
Бистиң корр.
Чурукту интернет четкизинден алган.