Тываның Тудуг яамызы «Амыдыралга инфраструктура» национал төлевилел-биле боттандырган «Амгы үениң хоорай хүрээлеңин хевирлээри» республика программазының республикада хөй-ниити шөлдерин чаагайжытканының чамдык түңнелдерин үндүрген. Бо чылын федералдыг деткимче-биле 19 муниципалдыг тургузугларда 31 хөй-ниити черлерин чаагайжыткан. Оон аңгыда Кызыл биле Туран хоорайларда боттандырган ийи төлевилел – таарымчалыг хоорай хүрээлеңин тургускан эң эки төлевилелдерниң Бүгү-россия чергелиг мөөрейинге тиилээн.
Регионалдыг Тудуг яамызы 29 объектиде тудуг ажылдары ноябрь эгезинде доозулганын дыңнаткан.
Туран хоорайда Бүгү-россия чергелиг мөөрейге тиилээн «Тываже хаалга» төлевилелдиң боттаныышкыны-биле чаагайжыдылга ажылдары төнчү чадазында келген. Бо төлевилелдиң онзагай чүүлү — керээ чарган тудугжулар бюджеттен дашкаар акша-хөреңги-биле боттарының үлүг-хуузун киирип турар. Муниципалдыг керээ езугаар «Восток» КХН ажылдарны бодунуң акша-хөреңгизи-биле чорудуп, хөй-ниити девискээринде садыг павильонун, «Өг-бүле» деп биче архитектурлуг тураскаалды, сандайларны, информация самбыразын, бок төгер черлерни тургузуп турар.
Кызылга төлевилелди боттандырып тура, Национал паркче кирер чер культура өнчүзүнге хамааржыр болгаш, культура өнчүзүн кадагалап арттырар септелге ажылдары кылдынар болганда, керээ чарган тудуг чери чөпшээрел документилер алырынга бергедээшкиннерге таварышкан. Ындыг-даа болза ажыл-иш чоруп, объектиде бузуп чазар, ыяш кезер, участокту планнаар, бокту үндүр сөөртүр ажылдар доозулган.
Тудуг яамызы Барыын-Хемчик кожууннуң Барлык биле Эрги-Барлык суурларда хуусаазындан озалдап турар ийи тудуг объектизин хүннүң-не мониторингилеп турар. Тудугну дүргедедири-биле ажылчын күш болгаш дериг-херекселдер-биле немей дузалажырын муниципалитеттиң чагыргазынга база ук объектилерниң тудуун бодунуң контролюнга алыр кылдыр кожуун чагыргазының амыдырал-хандырылга талазы-биле оралакчызынга дааскан.
Бистиң корр.
Чурукту ТР-ниң Чазааның парлалга албанындан алган.
“Шын” №44 2026 чылдың ноябрь 12
"Шын" солуннуң МАХ-каналынга каттыжыңар: max.ru/channel_shyn