Июнь 30-де Тываның Баштыңы Владислав Ховалыг «Өөредилгезинге онзагай чедиишкиннери дээш» деп медальдың эдилекчилери-биле ужуражылганы эрттирген.
Тываның школачыларының чаңгыс аай күрүне шылгалдаларының (ЕГЭ) түңнелдеринден көөрге, чылдан чылче химия, физика болгаш ниити билиг эртемнеринге билии экижип турар. «ЕГЭ-ге информатика эртемин шилип алган доозукчулар көвүдеп турар-дыр. Ол ышкаш эртем-шинчилел конференцияларының тиилекчилери болгаш ЕГЭ-ни 100 баллдарга дужааган уруглар саны көвүдеп турар. Ажы-төлдүң келир үеде амыдыралынче оруун ажыдып бээринге бүгү-ле болур чүүлдерни кылыр бис» – деп, Владислав Ховалыг демдеглээн.
Доозукчулар боттарының талазындан база өөрүп четтириишкин сөстерин илереткен. Анастасия Старикова шылгалдаларны чедиишкинниг дужаап алырынга дузалашкан бодунуң башкыларынга четтиргенин илереткеш, Владислав Ховалыгга эмчи болурун күзеп турарын, Санкт-Петербургтуң Эмчи институдунче дужаап кирер бодалын чугаалаан.
Доозукчулар аразында дээди өөредилге черин дооскаш, төрээн чуртунуң хөгжүлдезинге үлүг-хуузун киириштирери-биле, Тыва чуртунга ээп кээр уруглар база бар. Хову-Аксы ортумак школазының доозукчузу Каң-Болат Соян Москвага дээди өөредилге черинге өөрениксеп турар. Ол делегей болгаш национал туризм талазы-биле чедип алган эртем-билиин республиказынга келгеш ажыглаар сорулгазын дыңнаткан.
Бистиң корр.
