Тываның Баштыңының тускай шериг операциязының айтырыгларының талазы-биле төлээзи Тимур Куулар дайынчы хөделиишкиннерде киржип турар бистиң чаңгыс чер чурттугларывыска гуманитарлыг дуза чедиргеш, Ростов-на-Дону хоорайдан чоокта чаа чанып келген.
Тускай шериг операцияның киржикчилериниң төрелдери-биле Тываның Баштыңы Владислав Ховалыг чоокта чаа ужурашкан түңнелинде судмедэксперт эмчилериниң бөлүү Ростов-на-Дону хоорайда 522 дугаарлыг шериг кезээнде төпке барып ажылдаар шиитпир хүлээп алдынган. Дайынчы хөделиишкиннер үезинде амы-тынындан чарылган дайынчыларның мага-боттарын хүлээп алыр болгаш төрээн чуртунче чорудар ажыл ол төпте чоруп турар.
Ынчангаш тускай шериг операцияның айтырыгларының талазы-биле төлээ Тимур Кууларның Ростов-на-Дону хоорайда эң-не баштай барган чери 522 дугаарлыг шериг кезээ. Ында ажылдап турар судмедэксперт эмчилерниң бөлүүнүң удуртукчузу Херел Доржу болгаш ооң эштери эмчилер-биле ужурашкан. Май эгезинден элээн каш дайынчыларның мага-боттарын танып тыпкан болган.
Дайынчы хөделиишкиннер үезинде сураа чок читкен деп санады берген бистиң чаңгыс чер чурттугларывыс дайынчыларның ада-иелери, чоок төрелдери оларны танып тывар дээш, Ростов-на-Дону хоорайда бо төпке чедип турарлар. Тимур Куулар оларның-биле база ужурашкан. Төптүң удуртукчузу Марат Мурадасилов биле Тывадан дайынчыларның төрелдериниң ужуражыышкынын организастаан. Дайынчы хөделиишкиннер үезинде сураа чок читкен деп санадып турар дайынчыларны дилеп-тыварда кандыг документилер херегин, кандыг чурум-биле дилээшкинни чорударын төптүң удуртукчузу оларга тайылбырлап берген.
Бистиң чаңгыс чер чурттугларывыс дайынчы албан-хүлээлгезин эрттирип турары дугаары 55, 75 бригадаларга, Чөөн чүк шериг округунуң дугаары 38 болгаш 39 бригадаларга, дугаары 114 полка, Оожум океан шериг-далай флодунуң 155-ки бригадазынга Тимур Куулар четкеш, Тывадан дайынчы оолдар-биле ужурашкан. Ол ышкаш Төп шериг округунуң командылакчызы-биле база ужурашкан.
Тускай шериг операциязының айтырыгларының талазы-биле төлээниң удуртуп чорааны бөлүк Тывадан дайынчыларга гуманитарлыг дузаны база чедирген. Ооң иштинде 2 автомашинаның бирээзин Тывадан 55-ки гвардейжи мото-адыгжы (даг) бригаданың медицина ротазынга туда дамчыдып берген. Ол машинаны, бистиң чаңгыс чер чурттугларывыстың дилээ ёзугаар, балыглаткан дайынчыларга дүрген эмчи дузазын чедиреринге таарымчалыг кылдыр эде дерээн. База бир машинаны болгаш мотоциклдерни өске шериг кезектеринде Тывадан дайынчылар алгаш, дайынчы хөделиишкиннер үезинде чедиишкинниг ажыглап турар.
Чаа чылдың бүдүүзүнде база гуманитарлыг дуза чедирип чорааш, Тимур Куулар шериг кезектериниң бирээзинге дайынчы дроннар чогаадып кылып турар солдатка таварышкан. Ол “Кулибин” радиоэлектроника кезектери тып берип, дузалажырын дилээн. Ооң чагыглары ёзугаар дроннарның артык кезектерин тыпкаш, Тываның Баштыңының тускай шериг операциязының айтырыгларының талазы-биле төлээзи ол дайынчыга аппарып берген.
Тывада ат-сураа эки билдингир эмчилер династиязындан аныяк эмчи, анестезиолог Эрес Чадамба Бердянск хоорайның эмнелгезиниң реанимация салбырын эргелекчилеп турар. Сөөлгү сургакчылаашкын үезинде Тимур Куулар Донецк хоорайга бо эмчиге ужуражы берген. 55-ки бригададан бистиң чаңгыс чер чурттуувус дайынчыны Донецкиниң эмнелгелериниң бирээзинде чыттырып каан деп медээ келирге, Эрес Эргилович ол дайынчыны шинчип көргеш, канчаар эмнээриниң арга-сүмезин берген.
Тимур Кууларның удуртуп чорааны бөлүктүң кежигүнү, “Тыва” ансамбльдиң солизи Сыдым-оол Куулар ТШО-да киржип турар чаңгыс чер чурттугларывыска сыгыт--хөөмейни салып бээрге, оларның сагыш-сеткилинге уяранчыг болгаш бедик көдүрлүүшкүннүг болган.
Тываның чурттакчылары эрес-дидим, кандыг-даа бергелер үезинде бот-боттарынга болгаш өске-даа кижилерге кезээде дузалаар, бедик тура-соруктуг чон дээрзин тускай шериг операция үезинде болуушкуннар көргүзүп турар.
Ш. МОҢГУШ белеткээн.
«Шын» №42 2024 чылдың июнь 8
![](https://sun4-20.userapi.com/impg/BZjgfGyn8GJV1XdOqbVcsdYyxh0x_4wUhXc9Sw/r2SVIx8nLKk.jpg?size=807x605&quality=95&sign=fa297225971ac03662a5755fe8ff99c7&c_uniq_tag=yf0rKKensjZ3iXP3w_Mpz7_6lswsUMekESBXqvlQ6qQ&type=album)
![](https://sun4-19.userapi.com/impg/_ipRf6O05Ba81nI4tHrX1z240MdHRnVlPgLqqA/6tiUjM2b87E.jpg?size=807x605&quality=95&sign=6462cb5d08fb9a0881299ca2259f6ba8&c_uniq_tag=pJ3CWJpbGRCEDc_QgEbeJ7VKpsPziS83Ms9dYcFk8oM&type=album)