“Чаңгыс демниг Россия” политиктиг партияның боттандырып турары “Кадык келир үе” партийжи төлевилел улуг социал ужур-дузалыг. Россияның хамаатыларының кадыын быжыглаарынче, РФ-тиң кадык камгалал адырында байдалды экижидеринче, амыдырал-чуртталгада озал-ондактыг таварылгаларда кижи боду камгаланырынга болгаш өскелерге дузаны дүрген чедиреринге өөредири дээш янзы-бүрү угланыышкыннарлыг.
Озал-ондакка таварышканнарга дүрген дуза чедиреринге өөредилгелерни Кызыл хоорайда элээн каш хонуктар дургузунда чорудуп келген. Бо өөредилгелерни “Чаңгыс демниг Россия” политиктиг партияның боттандырып турары “Кадык келир үе” партийжи төлевилелиниң угланыышкыны-биле чорудуп турар. Өөредилгелерге хоойлу-чурум камгалал албан черлериниң ажылдакчылары, эмчилер, башкылар дээш өске-даа мергежилдерлиг кижилер киржип турар. Тывадан Күрүне Думазының депутады Айдың Сарыглар, Күрүне Думазының депутады, медицина эртемнериниң доктору, шериг эмчи Дмитрий Хубезов олар база Кызыл хоорайда өөредилгелерге киришкеннер.
Күрүне Думазының депутаттары Айдың Сарыглар, Дмитрий Хубезов олар-биле Тываның Баштыңы Владислав Ховалыг ужурашкаш, “Кадык келир үе” партийжи төлевилелиниң угланыышкыны-биле чорудуп турар өөредилгелерниң республиканың чурттакчыларынга ажык-дузалыын демдеглеп, озал-ондактыг байдалдарга кижи бүрүзү боду камгаланып, өскелерге дузалап шыдаарынга өөренириниң чугулазын демдеглээн.
Дүүн, ноябрь-8-те, Кызыл хоорайның хөй-ниити чемненилге черлери столоваялар, кафелер, рестораннарның ажылдакчыларынга баштайгы дузаны дүрген чедиреринге көргүзүг өөредилгени Күрүне Думазының депутады, эмчи Айдың Сарыглар эрттирген. Балыгланган кижиниң ханы төктүрүн соксадырын, балыгны шын шарыырын дузалакчылары-биле кады эмчи манекеннерге айтып көргүскен. “Сливки”, “Айва”, “Тос-Карак” кафелер дээш өске-даа хөй-ниити чемненилге черлериниң өөредилгеге келген ажылдакчылары билип алган чүүлдерниң оларның ажылынга чүү хире ажыктыын бөгүн медереп билгенин чугаалап турганнар. Чүге дээрге хөй-ниити чемненилге, куда-дой черлеринге хөй чон чыглыр, аңаа кадыкшылының байдалы кошкак кижилер кээп болур. Сайгарлыкчылар Б.А. Ооржак, А.А. Моңгуш өөредилге үезинде билип алган чүүлдерин боттарының ажылдакчыларынга өөредириниң чугулазын демдегледилер.
“Кадык келир үе” партийжи төлевилелиниң угланыышкыны-биле чорудуп турар дүрген дуза чедирер талазы-биле өөредилгелер ам-даа уламчылаар. Тускай шериг операция чоруп турар девискээрлер-биле кызыгаарлашкак регионнарда бо өөредилгени шеригжиткен байдалдарга эрттирип турарын демдеглеп, ооң бодунуң эрттирип турар өөредилгелерде тактиктиг аргалар база барын Айдың Сарыглар чугаалаан.
Ш. ЛОПСАН.
“Шын” №86 2024 чылдың ноябрь 9
