2023 чылда Тывада “Айыыл чок болгаш шынарлыг оруктар” национал төлевилел-биле кылдынган эң-не узун орук Кызыл кожуунда Моол кызыгаарының чанында «Восток» КХН-ниң септеп турары Кызыл – Эрзин оруу болган. Ооң узуну 10,5 км, калбаа 7 метр, ниити шөлү 74 000,00 дөрбелчин метр. Орукту асфальт болгаш бетон-биле шыпкан. Керээ ёзугаар 2023 чылдың майдан июль айга чедир кылып дооскан. Ниитизи-биле 25 орук ажылдакчызы, 15 ажыг тускай техника ажылдап турган.
Оңгар черлерни дескилээр, эрги орук демдектерин болгаш медээ бээр чагыжыгаштарны ап каапкаш, чаарткан. Ол ышкаш оруктуң кыдыгларын болгаш довурактыг черлерниң таваан, адаккы болгаш кырыкы каъдын, асфальт, бетондан тургустунган кырыкы болгаш дескилээр каъды дээш оон-даа өске ажылдарны кылган.
Май, июнь айларда орукту кылыр ажылдарны дүн-хүн чокка чорудуп тургаш, айыттынган хуусаазындан 1,5 ай эртежик доозупкан.
Кызыл кожуунда национал төлевилел-биле кылдынып турар оруктарны Орук-транспорт яамызы болгаш регионнуң Хөй-ниитиниң улусчу фронтузунуң салбыры хыналдада алган. Орукту бүрүнү-биле чаарткан. Эргижирей берген асфальтының орнунга чаа быжыг асфальтыны кылган.
Орук-транспорт яамызының медээлеринден Чыжыргана СААЯ белеткээн.
«Шын» №5 2024 чылдың январь 24
