Тускай шериг операциязынче гуманитарлыг дуза чорудар ажылдар ам-даа уламчылап турар. Удавас сентябрь төнчүзүнде ээлчеглиг чүъктү чорудары планда көрдүнген. Гуманитарлыг дузаны чон идепкейлии-биле чыып кирипкен.
«Бөгүн ТШО-же чорудар гуманитарлыг дуза чыыр ажылдар эгелээни бо. Соок үелер келгени-биле ТШО-да киржип турар чаңгыс чер чурттугларывыстың хереглелдери база өскерилген. ТР-ниң Чазаа-биле кады сентябрь төнчүзүнде чүъктүг машинаны чорудар деп планнап турар бис. Гуманитарлыг дуза кадарынче чонувусту кыйгырып тур бис. Камгаланыр четкилер аргып турар волонтерлар күскү өңнер-биле даарап эгелээн. Соок үеде чылыг хептер чугула херек. Моторлуг хирээлер, генераторлар амгы үеде чугула херек. Оон аңгыда, сентябрь 12-де ээлчеглиг автоколоннаны аъткарар бис. Абаканда демир-орукка чедиргеш, Донда Ростов хоорайга чедир поездиге чүдүрер. Машиналар биле гуманитарлыг дуза ТШО девискээринге чаңгыс үеде чеде бээрге, шериглерге үлээр бис» – деп, Улусчу фронтунуң Тыва Республикада регионалдыг салбырының удуртукчузу Саима Далчин чугаалады.
Улусчу фронт Тываның кожуун чагыргаларын гуманитарлыг дуза чыыр ажылдарга идепкейлиг киржип, чонну эвилелдээринче кыйгырып турар. Тус черлерде волонтерларга муниципалдыг эрге-чагырганың деткимчези дыка улуг дээрзин сагындыраалы.
Каа-Хем кожууннуң Сарыг-Сеп сумузунда «Надежда» деп волонтержу пунктунуң удуртукчузу, Сарыг-Сеп сумузунуң Баштыңы Аян Биликты:
– 2023 чылдың октябрь 24-те «Надежда» волонтержу пункт ажыттынган. Бо хүнге чедир 101 четкини өрээш, ТШО девискээринче чоруткан бис. Бөгүн 5 четки эккелдивис. Александра Шакированың удуртуп турары Улусчу полк-биле сырый харылзаалыг ажылдап турар бис. Олар биске четки өрүүрүнге херектиг чүүлдер-биле дузалажып турар. Сарыг-Сеп сумузунуң чурттакчылары, чаңгыс чер чурттугларывыска өөрүп четтиргенивисти илередир-дир бис. Оларның материалдыг деткимчези эвес болза, бистиң отряд-даа турбас боор. Чондан келген акша-төгерик талазы-биле дуза кол рольду ойнап турар. Чүгле тус черде чурттап чоруур чаңгыс чер чурттугларывыс эвес, а Камчатка, Сахалинде дээш Россияның ырак булуңнарында чурттап чоруур чаңгыс чер чурттугларывыс база акша-хөреңгизин чорудуп, буянныг үлүг-хуузун чедирип турар. Оон аңгыда, тус черниң чагырга чериниң база материалдыг дузазы аажок улуг.
Берге үеде чонувустуң демниг чоруу ТШО-да киржип турар чаңгыс чер чурттугларывыска дуза болуп турар. Хөй нуруузунда 10 кижи четки өрүп ажылдап турар. Эгезинде чаа ажыттынып келгенивисте кожууннуң шупту албан черлериниң ажылдакчылары киржип турду. Амгы үеде 10 кижи күзелдии-биле ажылда дег, эртенгиниң 9.00 шактан кежээ 16.00 шакка чедир ажылдап турарлар. Хөй кезиинде хүндүлүг дыштанылгада хамаатылар-даа болза, оларның аразында ажылдап турар аныяктар база бар.
ТР-ниң Кадык камгалал яамызы база бо удаада кемдээн кижиге баштайгы эмчи дуза кадарда ажыглаар дериг-херекселдерни болгаш эм-домну эккелген.
«Тываның Кадык камгалал яамызы болгаш республиканың эмнелгелери удаа-дараа ТШО-да чаңгыс чер чурттугларывыска дузаны кадып турар бис. Бо удаада балыгланган кижиге бир-ле дугаар эмчи дузазы чедирерде ажыглаар «Укладка» дээр тускай херекселди эккелдим. «Укладканың» иштинде эмнер болгаш бир дугаар эмчи дузазы чедиреринге ажыглаар херекселдер бар. Дайынчыларывыска кадыкшылды күзевишаан, кадыкшылын камнап чоруурун чагыыр-дыр мен» — деп, ТР-ниң Кадык камгалал яамызының төлээзи Валентина Маадыр тайылбырлады.
Сарыг-Септиң «Надежда» волонтержу пунктузунга чоокта чаа Кемерово облазындан полковник келгеш, ТШО киржикчилериниң өмүнээзинден өөрүп четтиргенин илереткени волонтержуларның хей-аъдын көдүрүп, ам-даа идепкейлиг ажылдаар күштү берген. Өрээн четкилерин Улусчу фронтуга болгаш Улусчу полкка хүлээдип турар. Ынчалза-даа чамдык таварылгаларда дайынчыларның чагыын езугаар база өрүп турарын чугаалады. Сарыг-сепчилерниң болгаш чагырга чериниң бергени акша-биле пөс-таавыны садып ап турары чугаажок. Буянныг үлүг-хуузун кылып турар эки турачыларга полковниктиң өөрүп четтириишкини оларны чалгынналдырып, хей-аъдын көдүрүпкен.
Тускай шериг операциязында киржип турар чаңгыс чер чурттугларывыска дуза кадар күзелдиг хамаатыларны Кызыл хоорайның Тыва эки турачылар кудумчузунда, 3 дугаар бажыңга келирин дыңнадып тур! Долгаар дугаар: 2-10-50.
Айдың ОНДАР.
Буян ООРЖАКТЫҢ тырттырган чуруктары.
“Шын” №68 2024 чылдың сентябрь 7
