Ол-ла хүн Волонтёрлар шуулганы В.М. Халилов аттыг Тываның күрүне филармониязынга «Бүгү чүүлдү тиилелгеже!» деп хемчег-биле уламчылаан. Тывада 2 дугаар эртип турар шуулганга республиканың эң-не идепкейжи, хөй-ниитижилери чыылган.
Улусчу фронтунуң Тыва Республикада регионалдыг салбыры кожууннардан келген волонтёржу командаларның үре-түңнелдиг ажыл-ижин онзалап демдеглээш, команда бүрүзүнге Өөрүп четтириишкин бижиктерин тывыскан.
«Тускай шериг операциязында киржип турар чаңгыс чер чурттугларывыска сеткилиңерден дузалажып, тиилелгеге үлүг-хууңарны киириштирип турарыңар дээш силерге улуу-биле өөрүп четтирдивис. Тулчуушкунда оолдарга ёзулуг-ла идегелдиг тыл болуп чор силер. Шуулганны эрттирип, силерни чыып турар ужурувус болза, Тывада чеже волонтёр барын ылавылап, силерни чаңгыс черге чыыр сорулгавыс боттанганы бо.
Амгы үеде республиканың девискээринде 100 ажыг волонтёржу пунктулар ажылдап турар. Бо чылдың эгезинден тура ТШО-же Тывадан 100 ажыг тонна гуманитарлыг чүъктү болгаш машина-техниканы аъткардывыс. Оон аңгыда, почта болгаш «Вайлдбериз» таварыштыр база чорудуп турган болгай» – деп, Улусчу фронтунуң Тыва Республикада салбырының удуртукчузу Саима Далчин дыңнатты.
Чонга ажыын көргүзер дээш, бүгү сагыш-сеткилинден бердинип чоруур хамаатылар хөй. Оларның бирээзи Лалиса Сат. Ол база шуулганга келген. Лалиса «Серебряная нить» ательезинде ажылдап турар. Бо ательениң ажылдакчылары тускай шериг операциязы эгелээнден бээр волонтёржу ажылдарны кылып чорудуп эгелээн. Чылыг чеңи-чоктар, чоорганнар даарап, камгаланыр четкилер өрүп турар. Олар Улусчу фронтуга болгаш Тываның Чазаанга волонтёржу эгелээшкиннерин деткип, материалдыг дузаны көргүзүп турары дээш өөрүп четтиргенин илереткен.
Сүт-Хөл кожуун чагырыкчызының социал политика талазы-биле оралакчызы Светлана Очур-оол ук кожууннуң делегациязын удуртуп келген.
«Кожуунувуста эки турачылар ажылы ТШО эгелээнден бээр кончуг идепкейлиг чоруп турар. Оон бээр-ле өске кожууннар дег, гуманитарлыг дузаны чорудуп турар бис. Даараныр авалар даарап, аргыыр улус аргып дээш черле кижи бүрүзү бодунуң шыдаар-ла шаа-биле дузалажып турар. Ноябрь 13-те кожуунувуста «Бүзүрел» деп эки турачылар фондузун тургузуп алдывыс. Фондунуң өзек киржикчилери 15 кижи. Шуулганга киржир дээш, алды кижи чедип келдивис» – деп, ол дыңнатты.
Регина Монгуш Сүт-Хөл кожууннуң Ак-Даштан келген идепкейжи волонтёр: «Суурувустуң чону ТШО эгелээнден бээр гуманитарлыг дузага идепкейлиг киржип турар. Кезек идепкейлиг авалар чонувустан аът чели чыып алгаш, дыдып, ээрип алгаш, күзелдиг иелерге үлеп бээривиске, уктарны аргып турар. Бо удаада уктар аргып тур бис. Ооң мурнунда чеңи-чоктар даарап турдувус. Боорзак быжырып, тыва далган белеткеп дээш, дыка идепкейлиг киржип турар бис. Суурувустуң аныяктары чондан акша чыыр ажылдарны чорудуп турар. Ол акша-биле херек материалдар садып алгаш, дааранып турар бис. ТШО-да оолдарның дилээн езугаар аът челинден уктар аргып эгеледивис» — деп, ол чугаалады.
Тыва Республиканың Хоочуннар эвилели 2024 чылдың апрельден эгелээш, бо хүннерге чедир 30 тускай четкини өрээш, 4 генераторну база өске-даа чугула херек чүүлдерни саткаш чорутканын демдеглээри чугула.
Оон аңгыда, ТР-ниң Аныяктар херектериниң талазы-биле яамының ажылдакчылары Добро.Ру платформага бүрүткеткеш, волонтёрнуң албан-езузу-биле эрге-байдалын (статус) канчаар алырының дугайында тайылбырлаар шөлчүгешти организастаан.
Айдың ОНДАР.
Буян ООРЖАКТЫҢ тырттырган чуруу.
«Шын» №94 2024 чылдың декабрь 7
