Москва хоорайда Россияның чогаадыкчы неделязында Тыва Республиканың делегациязы киржип турар. «Үре-түңнелдиг болгаш чижилгелиг экономика» национал төлевилелдиң күүселдези-биле база Тыва Республиканың Экономиктиг хөгжүлде болгаш үлетпүр яамызының база ТР-ниң сайгарлыкчы чорукту деткиир фондунуң дузазы-биле олар чурттуң кол болуушкунунга киржип турары ол.
Ук хемчег чурттуң экономика адырында кол болуушкун болуп турар. Чогаадыкчы неделя 2020 чылдан тура экономика адырынга чаа угланыышкыннарны ажыдып, кады ажылдажылганы деткип, чурттуң келир үеде хөгжүлдезиниң стратегияларын тургузуп турар.
Тывадан барган төлээлерниң кол сорулгазы — дизайн, медиа болгаш технологиялар адырларындан арга-дуржулганы алыры, республика девискээринге янзы-бүрү төлевилелдерни боттандырарынга кады ажылдаар шыырак сайгарлыкчылар-биле харылзаа тудары база хөөмей-сыгыт, чаагай чаңчылдар, бай-байлак бойдузувус дээн ышкаш регионнуң байлак культуразын бараалгадыры.
Тываның төлээлерин ТР-ниң экономика сайыдының оралакчызы Аржаана Доңгак удуртуп чораан. Олар Россия Федерациязының Чазак Даргазының оралакчызының чогаадыкчы ажыл-агыйлар хөгжүдер талазы-биле оралакчызы Антоний Швиндт, «Авито» компаниязының күрүне организациялары-биле харылзаа тудар талазы-биле килдистиң директору Дмитрий Гавриленко, ниити аарыглар эмчизи, остеопат, психофизиолог, «Болинет» деп номнуң автору Начин Добрый олар-биле ажыл-агыйжы ужуражылгаларны организастаан. Ажыл-ижинге федералдыг деңнелге үнелелди алган чаңгыс чер чурттуу-биле ужуражыры Тывадан барган делегацияга улуг чоргаарал болганы чугаажок.
ТР-ниң Экономика яамызының медээзинден.
Чуруктарны интернеттен алган.
“Шын” №38 2025 чылдың октябрь 2
