Россияныӊ Социал фондузунуӊ Тывада салбыры тускай шериг операциязыныӊ киржикчилеринге онза кичээнгейни салып турар.
— Шериг улустуӊ өг-бүлезиниӊ кежигүннеринге эптиг байдалды тургускан. Келген хамааты бүрүзүнге тускай консультантыны кады ажылдаар кылдыр быжыглаан. Кандыг документилер херегин, чогуур справкаларны кайыын алырын олар айтып бээр. Оон аӊгыда, документилерни ап алырынга база дузалажыр. Өг-бүле кандыг социал деткимчелерни ап болур дээрзин тодаргайы-биле тайылбырлап берип турар– деп, Тывада Социал фонд салбырыныӊ удуртукчузунуӊ оралакчызы Часкал Дараа чугаалаан.
«Ада-чурттуӊ камгалакчылары» фондунуӊ регионалдыг салбырынга четверг санында 10–13 шактарда социал фондунуӊ ажылдакчылары хүлээп ап турар. Дайынчы хөделиишкиннерниӊ хоочуннары, шериглер база оларныӊ өг-бүлезиниӊ кежигүннери аӊаа база барып болур.
Социал төлевирлер, чиигелделерге хамаарыштыр сүмелерни айтып берип, чогуур билдириишкиннерни долдурарынга дузалаар.
«Ада-чурттуӊ камгалакчылары» фондунуӊ регионалдыг салбырыныӊ адрези: Кызыл хоорай, Кызыл партизаннар кудумчузу, бажыӊ 30.
Күрүнениң социал төлевирлерин, чиигелделерни бээр
Мобилизастаан хамаатыларныӊ 17 хар четпээн уругларынга база ижинниг кадайынга чаӊгыс аай пособиени бөдүүнчүткен чурум-биле бээр. Билдириишкин киирген болза, мобилизастаан хамаатыларныӊ орулгазын санавас, өг-бүлезиниӊ өнчү-хөреӊгизин барымдаалавас. Пособиени билдириишкин киирген айдан тура санаар. Чаа төрүттүнген уруу 6 ай четпээнде, херээжен кижиниӊ иштиг байдалы 6 неделя четпээнде билдириишкин киирер. Чаӊгыс аай пособиени 6 ай дургузунда алыр.
Мобилизастаан хамаатыныӊ кадайыныӊ иштиг байдалы 180 хүн ажа берген болза, чаӊгыс катап бээр пособиениӊ Тывада хемчээли 54 548 рубль болур, Тожу, Мөӊгүн-Тайга кожууннарда, Тере-Хөлдүӊ Шынаа сумузунда чурттап турар улуска – 58445 рубль.
Билдириишкинни өөнүӊ ээзи ТШО девискээринден чанып келген соонда, 6 ай эртпээнде, мобилизастаан хамаатыныӊ өөнүң ишти киирип болур.
Мобилизацияже келдирген шеригниӊ өг-бүлезинде 3 хар четпээн ажы-төлү бар болза, ай санында пособие алыр. Тывада ооӊ хемчээли 23 378 рубль болур, Тожу, Мөӊгүн-Тайга кожууннарда, Тере-Хөлдүӊ Шынаа сумузунда чурттап турар болза – 25 047 рубль. Чаш төлдүӊ ачазы тускай шериг операциязында киржип, азы келдириишкин-биле шериг эрттирип турар деп справканы билдириишкин киирерде көргүзер.
ТШО девискээринге шериг албан эрттирип турар үезинде камгаладылга стажын бир чылда 3,6 пенсия коэффициентизин көрүп, ийи дакпыр хемчээл-биле санаар.
Дайынчы хөделиишкиннерниӊ хоочуну деп эрге-байдалдыг шериглер, эки турачылар социал фондузундан ай санында акша төлевир ап турар.
Эки турачыларга хамааржыр болгаш ТШО девискээринге тургаш, инвалид апарган шериглерге пенсия болгаш шериг кемдээшкини дээш ай санында компенсацияны социал фондунуӊ Тывада салбыры шилчидип турар.
Россияныӊ Социал фондузу ТШО киржикчизинге реабилитацияныӊ техниктиг херекселдерин садып алырынга электроннуг сертификаттарны 2024 чылда берип эгелээн. ТШО-нуӊ киржикчизи сертификат алыр дээш билдириишкин киирбес. Реабилитация программазы болгаш техниктиг херекселдер-биле хандырар сүмелер дугайында медээлер чедип келирге, социал фондунуӊ Тывада салбыры боттары кылып бээр.
ТШО-нуӊ киржикчилери болгаш оларныӊ өг-бүлезиниӊ кежигүннери күрүне деткимче хемчеглерин алыр дизе, Күрүнениң ачы-дуза порталынга, социал фондунуӊ салбырыныӊ клиентилер албанынга азы МФЦ таварыштыр билдириишкин киирип болур.
Социал фондунуӊ Тывада салбырыныӊ харылзажыр телефону: 8-800-200-05-43. Ажыл хүннеринде 09.00 шактан тура 18.00 шакка чедер. Долгаары халас болур.
Социал фондунуң медээлеринден.
Чурукту интернет четкизинден хоолгалаан.
“Шын” №88 2024 чылдың ноябрь 16
