Чоннуң чаңгыс деминиң хүнүнүң бүдүүзүнде Тываның Чазаанга Федералдыг чыыштың Федерация Совединиң «Эрес-дидим чоруун көргүскени дээш» деп тураскаалдыг медальдарын тыпсыр езулал болган. Аңаа РФ-тиң сенатору Дина Оюн, Тываның Чазак Даргазының оралакчызының хүлээлгезин күүседип турар Айдыс Сынаа база ТР-ниң Аныяктар яамызындан, ИХЯ, ОБЯ-дан төлээлер, Республиканың кадеттер корпузунуң кадеттери, аныяктарның хөй-ниити шимчээшкиннериниң киржикчилери киришкен.
Шаңналга төлептиг болган чалыы маадырлар кымнарыл дээрге Барыын-Хемчик кожууннуң Кызыл-Мажалыктың 1 дугаар школазының 8 «б» клазының өөреникчизи Алдын-Херел Саая биле 7 «б» класстың өөреникчизи Ян Ооржак база Республиканың медицина колледжизиниң сургуулу Ринчен Сазанаков олар-дыр.
"Шаңналга төлептиг маадырлар, улуг кижилер-даа эвес, а берге байдалга таварышкан улуска дузазын каткан, эрес-дидим, сагыш човаачал элээди школачы оолдар-дыр. Ындыг чорук өг-бүледен эгелээр. Бөгүн мында оларның ада-иелери, чоок кижилери база келгени өөрүнчүг-дүр. Мындыг төлептиг оолдарны кижизидип, өстүргени дээш оларга мөгеер бис" – деп, сенатор Дина Оюн чугаалаан.
Ада-чурттуң Улуг дайынының үезинде Ровнога тыва эки турачыларның маадырлыг чоруун сенатор төөгүп чугаалааш, элээди маадырларның кылган чоруун база чыылганнарга таныштырган.
2023 чылдың сентябрь 11-де Кызыл-Мажалыкка школачы оолдар Ян Ооржак биле Алдын-Херел Саая школа девискээринге бергедеп чыдар улуг назылыг кижини көрүп кааш, дораан-на бирги дузаны катканнар. Эпилепсия аарыглыг хоочун ол школаның ажылчыны Макар Казак-Хааевич Ооржак болган. Оолдар дүрген дуза эмчилери кээрге чедир кырган-ачаның амы-тынын камгалаан. Оолдарны школазынга ОБЯ ажылдакчызы бирги дуза кадарының эге билиглеринге өөредип кааны кончуг ажыктыг болган.
Ринчен Сазанаков эрткен чылдың сентябрь 27-де школа соонда чанып бар чыткаш, (ынчан школачы турган), күштекчиден бир херээжен кижини камгалап каан. Элээди оол 45–50 хире харлыг кем-херек үүлгедикчизинден кыс кижини хостап алганы езулуг-ла маадырлыг чорук.
«Эрес-дидим чоруун көргүскени дээш» деп тураскаалдыг медальдарга төлептиг болган элээди маадырларга Дина Оюн хөрек демдектерин байырлыг байдалга тывыскан.
Дараазында «Россияның Маадыры» Чалым Чүлдүм-оол, Тываның Чазак Даргазының оралакчызының хүлээлгезин күүседип турар Айдыс Сынаа, ТР-ниң аныяктар сайыды Субудай Оюн база «Баштайгыларның шимчээшкининиң» кежигүннери шаңнал алган оолдарга болгаш оларның ада-иелеринге, чоок кижилеринге байыр чедирген чылыг-чымчак сөстерни илереткен.
Чойганмаа Петровна биле Лев Март-оолович Сааялар оглу Алдын-Херелдиң улуг шаңнал алганынга чоргаарланып, деткип келгеннер. «Алдын-Херел оглувус алды ажы-төлүвүстүң дөрт дугаары. Оглувустуң өөредилгези эки, чурумнуг, аажы-чаңы топтуг-томаанныг. Өөредилгеден аңгыда, сонуургалдары база хөй. Уран чүүл школазының вокал салбырын бо чылын чедиишкинниг доосту, ам кожууннуң баскетбол командазының кежигүнү. Алдын-Херел школазын дооскаш, камгалакчы болур күзелдиг кижи. Мындыг улуг шаңналга ооң төлептиг болганы дээш өөрүп тур бис» — деп, Чойганмаа Петровна өөрүшкүзү-биле үлешкеш, оглунуң школада, уран чүүл школазында башкыларынга база баскетбол тренеринге өөрүп четтиргенин илереткен.
А. СОЯН.
Буян Ооржактың тырттырган чуруктары.
«Шын» №82 2024 чылдың октябрь 26
