Эрткен дыштаныр хүннерде Кызылдың Иркутск кудумчузунда көдээ ажыл-агый ярмарказында майгыннар немешкенин кызылчылар эскерген боор. Найысылалда «Правобережный» болгаш «Восточный» көдээ ажыл-агый рыноктарында эът өртээн доктаадып өйлээн соон дарый, республиканың араттарынга эът болгаш эът продукциязын садып-саарар ажылдарны организастап эгелээн.
Иркутск кудумчузунда ажык рынокту Тываның арат ажыл-агыйын болгаш көдээ ажыл-агый кооперативтерин хөгжүдер фондунуң эргелелинге дамчыткан дээрзин ТР-ниң Көдээ ажыл-агый яамызы дыңнадып турар. Ук Фонд дыштаныр хүннерде ол рынокче кожууннардан араттарны чалааш, оларның садыг-саарылгазынга эптиг байдалды тургузары-биле тускай кызыл майгыннарын тургускан.
Тываның Көдээ ажыл-агый яамызының башкарыл- газынга хамааржыр Тываның арат ажыл-агый болгаш көдээ ажыл-агый кооперативтерин хөгжүдер фондуга бо ажык рынокту дамчыткан соонда, ооң чүгле өртектери өскерлир эвес, рыноктуң боду садыг-саарылга чорудар черлерниң санитарлыг болгаш эстетиктиг байдалы чогуур деңнелдиг болур ужурлуг.
«Чүнүң-даа мурнунда ол дээрге санитарлыг нормалар болгаш чурум-дур. Шупту продукцияның шынарын ветеринария албан чери үргүлчү хынаар ужурлуг. Бо хүнде Фондунуң күжү-биле организастаан садыг-саарылга черлеринге немей 30 точканы тургузар бис. Ол бистиң араттарывыска чыл төнчүзүнге чедир халас болур ужурлуг» — деп, көдээ ажыл-агый сайыды Алдай-Мерген Ховалыг дыңнаткан.
ТР-ниң Көдээ ажыл-агый яамызы мал-маган тудуп турар араттарны дыштаныр хүннерниң ярмарказында ук Фондузунуң тургускан майгыннарынга, малының арыг, шынарлыг эъдин эккеп садарынче кыйгырып турар. Фондунуң телефону: 2-62-22.
Бистиң корр.
"Шын" №55, 2023 чылдың июль 26