Бөгүн Тыва үндезин культура төвүнге Делегей чергелиг IV-кү «Азий диптиң төвүнде Хөөмей” фестивальдың киржикчилери-биле брифинг болуп эрткен. Аңаа Моолдан, Татар Республикадан болгаш Тывадан хөөмейжилер киришкен.
Фестивальдың кол организакчылары - Тыва үндезин культура төвүнүң директору Игорь Көшкендей, ооң оралакчызы Меңги Ондар, Тываның Улустуң хөөмейжизи Андрей Монгуш, “Хөөмей” Академиязының директору Бады-Доржу Ондар чыылганнарга байыр чедирип, журналистерниң болгаш киржикчилерниң айтырыгларынга харыылааннар.
Тыва үндезин культура төвүнүң директорунуң оралакчызы Меңги Ондар фестивальды Президент грантызының, Тыва Чазактың болгаш ТР-ниң Культура яамызының деткимчези-биле эрттирип турарын дыңнаткан. Эрткен ийи чылда коронавирус хамчыктыг аарыг үезинде фестивальды эрттирери болдунмаан-даа болза, бо чылын ону Тываның Улустуң хөөмейжизи, делегейде ады алгаан Коңгар-оол Ондарның чырык адынга, (чораан болза, март 29-та 60 харлаар турган) тураскаадып эрттирип турар деп чугаалаан.
Өгбелерниң дамчыдып бергени улуг эртинези - хөөмейге тураскааткан фестиваль дээрге чүгле мөөрейлежири эвес, а хөөмейлеп чоруур кижи бүрүзүнүң сагыш-сеткилин доюлдурар улуг байырлалы болур дээрзин чыылганнар чугаалашкан.
Бот-боттарын шагда-ла таныжар апарган ырак-чооктан келген хөөмейжилерге аразында база катап ужуражып, хөөрежип, аралажырынга, чоннар аразында найыралды, харылзааны быжыктырарынга бо фестиваль кончуг эки чылдагаан болуру билдингир. Ындыг-даа болза, фестивальдың кол шаңналы –автомашинаны кым-на алыр ирги дээн бодал киржикчи бүрүзүн дүвүредип турбайн аан.
А кол шаңналды Тыва Чазак, ТР-ниң Культура яамызы, Тыва үндезин культура төвү, алдарлыг хөөмейжи Коңгар-оол Ондарның дөргүл-төрели болгаш эш-өөрү демнежип сатканын сагындырып каалы. Ол ышкаш бирги чергениң лауреады атка төлептиг болган хөөмейжи 100 муң рубль болгаш бүрүнү-биле дерип каан аътты алыр деп, организакчылар брифинг киржикчилеринге дыңнаткан.
Оон аңгыда, оргкомитеттиң берген медээзи-биле алырга, бо хүнге чедир бүрүткел эрткен фестиваль киржикчилериниң саны амдыызында 81 чеде берген. Оларның аразында Моолдуң Кобту аймааның театрындан, Улан-Баатор хоорайдан ниитизи-биле 12 хөгжүмчү, Татар Республика, Саха Республика (Якутия), Хакасия, Даг-Алтайындан, Кыргыс Республикадан, Тывадан киржикчилер бүрүткедип алган. Оларның аразында чаңгыстың күүселдезинде Тывадан 51 хөөмейжи, аалчылар – 16 кижи. Ансамбль кылдыр 14 киржикчи бүрүткеткен.
Өске чылдарда хөөмей фестивалынга делегейниң барык бүгү чурттарындан улус кээп киржип турган дизе частырыг болбас. Бо удаада, делегей байдалынга чагырткаш, чамдык даштыкы (Америкадан, Норвегия, Япония, Кыдат болгаш өске-даа) чурттардан хөөмейжилер кээп шыдаваан. Олар онлайн хевирге киржир болган.
К. Монгуш.
Чуруктар авторнуу
#ХөөмейвЦентреАзии
#Международный_фестиваль_Хоомей_в_Центре_Азии #грандиозное_событие #культура_Тувы #Фондкультурныхинициатив #Грантдлякреативныхкоманд @pfci.grants https://фондкультурныхинициатив.рф
