Улусчу фронт болгаш Тываның Камбы-лама эргелели Шагаа бетинде дайынчыларга гуманитарлыг дузаны чыып эгелей берген.
"Цеченлинг" хүрээзиниң бир дугаар каъдында ажылдар кидин түлүк чоруп турар. 2024 чылдың ноябрь айда ажылын чорудуп эгелээн Россияның буддистер ассамблеязының эки турачылары дүн-хүн чок шериглерге чаштыр четкилерни аргып турарлар.
“Бистиң буддистер ассамблеязында үзүк чок, доктаамал ачы-хавыяазын киирип турар 10 идепкейжи эки турачы бар. Үш-ле ай дургузунда волонтёрларывыс саны каш дакпыр көвүдей берген. Чайлыг үезинде келгеш, дузалажып турар улус база дыка хөй. Чижээ, мен хүрээге номга олуруп алыр дээш келгеш, мындыг эки турачылар организациязы бар боорга, боданмайн-даа, дораан бижидип алган мен. Бис янзы-бүрү дузаны дайынчыларывыска чедирип турар бис”— деп, Россияның буддистер ассамблеязының эки турачызы Таисия Моңгуш чугаалаан.
Ол ышкаш ыт дүгүнден даараан ооргага чылыг тускай куржагларны база Цеченлинг хүрээзинде даарап турар. Ооң мурнунда фронтуже хөй эвес санныг каш куржаг чорударга, дайынчыларның сонуургалы улуг болган. Ынчангаш катап база даарап бээрин дидим оолдарывыс дилээн. Ук куржагны чүгле хөвең материалдан кылыр, шык черлерде удуп турар оолдарга өл эрттирбези онзагай. Ам 100 хире куржагны даараар сорулганы буддистер ассамблеязының волонтёрлары салып алган.
Тываның ламалары болгаш буддистер ассамблеязы тускай шериг операциязының киржикчилеринге улуг ачы-дузаны чедирип турарлар.
“Тускай шериг операциязы эгелей бээрге, Тывадан лама башкылар фронтуже эртенинде-ле аъттаныпканнар. Ол ышкаш Тывада ламалар хүннүң-не 9.00 шакта сагыызынныг номнарны дайынчыларывыска дээш үзүктел чок номчуп турар. Оон аңгыда, акша-хөреңгини окташкаш, автомобильдер болгаш янзы-бүрү техникаларны, бистиң оолдарывысты ок-боодан камгалаар кылдыр номчуп каан камгалалдарны бо-ла чорудуп турар бис. Дайынчыларывыс-биле дорт харылзажып турар бис. Ынчангаш чүү херегин эки билир бис. Шериглерге мотоцикл дыка ажыктыг болган. Ооң мурнунда бир эжи балыгланган болза, 8 кижиниң күжү херек турган, ам бо транспорт-биле чүгле чаңгыс кижи дузаны кадыптары өөрүнчүг болбайн канчаар. Эрес Хуурактың ачызында чоруткан чүъгүвүс чагыдыкчының бодунуң холунга барып турарын демдеглеп каалы.
Чыл санында-ла Шагаа бүдүүзүнде ламаларывыс дайын шөлүнче чорупкаш, хондур номну номчууру чаңчыл апарган деп болур. Бо удаа база белеткенип тур бис. Ынчангаш гуманитарлыг дузаны чыгжып бээр кылдыр чурттакчы чонувусту база дилээр-дир бис” — деп, Тывада буддистер ассамблеязының эки турачыларының удуртукчузу Лопсан Моңгуш кыйгырган.
Бо удаа чугула дуза Курск болгаш Запорожье областарында хүлээлгезин күүседип турар оолдарга херек. Ылаңгыя техника дериг-херексели, чылыг пушкалары, бензинниг генераторлар, улуг автомашиналар септээр херекселдер, квадроциклдер, мотоциклдер, эм-таң дээш чугула херек чүүлдер-ле хөй.
Улусчу фронтунуң регионалдыг салбырының удуртукчузу Саима Далчин чонну гуманитарлыг дуза чыырынга идепкейлиг киржиринче кыйгырып турар: “Бистиң оолдар доңуруп каан эъттер алгаш, сеткилиниң ханызындан дыка өөрүүрлер. Төрээн чериниң малының эъдинге кандыг-даа аъш-чем деңнешпес болбайн канчаар. База ол ышкаш янзы-бүрү техниканы дыка хереглеп турарлар. Азы болза чыгжып берген акша-хөреңги-биле чагыгларын күүседип берип болур бис. Эрес-дидим оолдарывыс бистиң дузавыс манап турарлар боор. “Демниг сааскан теве тудуп чиир”, мындыг дүшкүүрлүг үеде мөөңнежири чугула“.
Ачы-дуза чедирер күзелдиг кижилер эге дээрезинде 2-10-50 деп дугаарже долгааш, сүмележип ап болур. База ол ышкаш акцияга хамаарыштыр сонуургап турар айтырыгларын салып болур.
Гуманитарлыг ачы-дуза хүлээп алыр пунктулар Улусчу фронтунуң регионалдыг күүскомунда, Тувинских добровольцев 3-те ажылдап турар. База ол ышкаш “Цеченлинг” хүрээзинде база пункт бар.
Олча СААЯ.
«Шын» №1 2025 чылдың январь 16
