Тываның күрүне университединиң база Кызылдың тудуг техникумунуң тудуг отрядтары эң улуг энергетика компаниязының Бүгү-российжи студент тудуунуң шилилдезин эрткен.
Тывадан “Алдын холдар” каттышкан тудуг отряды Башкортостан, Новосибирск, Воронеж, Удмуртия, Москва, Кострома, Орел, Самара, Иркутск, Тюмень, Красноярск, Архангельск, Алтай, Чувашия, Кузбасс, Ямало-Ненецкиден 27 отряд кирген “Сибирь” бүгү-российжи студент тудугларга ажылдаар.
Тывадан «дуңзаалакчы», «суг хандырылгазы база суг чорудулгазы», «сантехниктиг, агаар арыглаар болгаш үрдүрер иштики тургузугларны эптээри база ажылдадыры», «тудуглар болгаш оран-савалар тудуу болгаш ажыглалы» деп мергежилдерде өөренип турар сургуулдардан тургустунган 29 тудуг отряды «Газпром» ААН Бүгү-российжи студент тудуунче аъттаныптар. Тываның тудуг отрядтары «Газпромнуң» шилилдезин үш дугаар чыл чедиишкинниг эрткени ол.
Тываның күш-ажылчы аныяктарының алдын холдары болгаш билиг-мергежили өске-даа студент тудугларда хереглелдиг. Оолдар бүдүн чыл дургузунда төрээн республиказының аңгы-аңгы бүдүрүлгелеринде база тудуг объектилеринде бетончулар, дашчылар, дуңзаачылар, слесарьлар дээш өске-даа мергежилдерже чалаттыргаш, ажылдап турарлар. Тываның уругларның дыштанылга лагерьлеринде база өске-даа регионнарда башкы отрядтарында, Камчаткада – балык болбаазырадыр ажылдарда бистиң аныяктарывыс бар. Донбасс база Луганскыга ажылдаан студент тудуг отрядтарының шалыпчылары чурттакчылыг суурлар чаагайжыдылгазынга үлүүн киириштирген.
«Россияның студент отрядтары» аныяктарның бүгү-российжи хөй-ниити организациязының 2012 чылда үндезилеттинген Тываның регионалдыг салбырында 14 отряд 300 хире дайынчыларны хаара туткан. Аныяктар дараазында угланыышкыннарда: педагогиктиг отрядтар, көдээ ажыл-агый отрядтары, сервис отрядтары, экологтуг отрядтар, балык болбаазырадылгазының отрядтары, дилеп-тывар камгалал отрядтарында ажылдап турарлар.
Студент кижиге Россияның тудуг отрядының дайынчызы болуру чүгле бүдүрүлге практиказын эртеринге эвес, а диплом алган соонда, чогуур күш-ажыл стажын ажылдап алырынга кедилиг. Ажылдап эгелээн дайынчыга электроннуг күш-ажыл дептерин ажыдар, студентилер шалың төлевирин дооскан специалистиң деңнели-биле алыр.
А. МОНГУШ
«Шын» №38 2024 чылдың май 25
