Россия Федерациязының Президентизи 55-ки аңгы мото-адыгжы (даг) бригадага «гвардейжи» деп хүндүлүг атты тыпсыр дугайында чарлыкка атты салган.
Тываның Баштыңы Владислав Ховалыг айыттынган шериг кезээнде албан-хүлээлгезин эрттирип турар чаңгыс чер чурттугларын деткип, маадырлыг чоруунга бедик үнелелди берип, алдар-хүндүнү көргүзүп турары дээш Дээди кол командылакчы Владимир Путинге, Камгалал яамызынга, Россияның Маадыры Сергей Шойгуга четтиргенин илереткен.
Ада-чуртунуң база дайынчы чөрүлдээлер үезинде күрүнениң сонуургалдарын камгалаан дайынчы хөделиишкиннерде полктуң болгаш бригаданың хуу составтарының көргүскен эрес-дидим болгаш маадырлыг чоруу, тура-соруктуу болгаш хей-аъды дээш ол атты тыпсырын документиде айыткан.
Россия Федерациязының Чепсектиг Күштериниң Чиңгине штавының дужаалы-биле, Тыва Республиканың найысылалы Кызыл хоорайга, 2015 чылдың ноябрьда, 55115 ниити шериг дугаарлыг 55-ки аңгы мото-адыгжы (даг) бригада хевирлеттинип тургустунган.
Өөредилгелиг ниити шериг белеткелиниң соонда шыңгыы шылгалданы шыдажып эрткеш, керээ-биле кыйгырткан оолдардан хууда составты четчелээн. Төп шериг округунуң составында чүгле чаңгыс мото-адыгжы (даг) бригада мурнунда салдынган бүгү-ле сорулгаларны, ооң иштинде тускай шериг операциязында шылгараңгай күүседип турар.
Бригаданың бедик деңнелин бадыткаан «гвардейжи» ады Россияның Чепсектиг Күштериниң шериг каттыжыышкыннарының аразында үлегер-чижектиг шериг кезээ дээрзин көргүзүп турар.
ТР-ниң Чазааның парлалга албаны
«Шын» №1 2024 чылдың январь 10