Санитар-эпидемиологтуг дүрүмнерни хажытканының соонда, уругларның аарыын болдурганы дээш Тываның Уруглар бажыңының эргиде директору судтуң мурнунга харыысалгага турар апаар.
Ук албан-дужаалды ээлеп турган 37 харлыг херээжен кижини оваарымча чок чоруктуң түңнелинде уругларның калбаа-биле аарыын болдурган санитар-эпидемиологтуг дүрүмнерни хажытканынга буруудадып турар.
Россияның Истелге комитединиң төп Аппарады кеземче херээн доктаамал хайгааралга алган турган.
Истелгениң догааштырыы-биле алырга, 2022 чылдың март айда эмнелге чериниң кол эмчизи тургаш, бо херээжен кижи дүрүмнерниң сагылгазын хажыткан болуп турар. Түңнелинде, 12 уруг аараан. Халдавырлыг аарыгдан аараан им-демдектиг уругларны өскелерден аңгылаар, оларны эмнелгеге чыттырар хемчеглерни кол эмчи хүлээп албаан. Ындыг чүүл халдавырлыг аарыгның калбарып нептерээринге чедирген.
Эргежок чугула истелге хөделиишкиннерин истекчи кылган: болуушкун болган черни шинчилээн, документилерни болгаш суд-медицина документилерин хынаан, ооң иштинде комиссия шинчилелдериниң база херечилерни байысааган, болур-чогуур документилерни чыгган. Бадылаттынган буруудадыглыг кеземче херээн эчизинге чедир сайгарып көөрү-биле, судче чоруткан.
Россияның Истелге комитединиң Тывада истелге эргелелиниң медээлеринден.
“Шын” №22 2024 чылдың март 23
