Тывада амгы үеде 25 хөмүр-даш шыгжаар складтар бар. Эрткен чылдың одалга сезонунда байдалга деңнээрге, 2 склад немешкен. Республиканың Одалга болгаш энергетика яамызының дыңнатканы-биле, ам келир кыш уткуй хөмүр-даш шыгжаар черлерниң оран-савалары белен, оларның чамдыызында материалтехниктиг бааза белеткээр талазы-биле ажылдар чоруттунуп турар: хөмүр-даш килдээр улуг деңзилерни септеп-селип, долгандыр херимин быжыглап, чырыдылгазын экижидип турар.
Бо неделяда чамдык складтарже хөмүр-дашты киир сөөртүп, үүжелеп эгелээн. Чадаананың болгаш Каа-Хемниң хөмүр-даш уургайлары складтарга үүжелээр хөмүр-дашты берип эгелээн – одалга сезонунуң эгелээринге чедир хөмүр-даш курлавырларын тургузуп четтигер ужурлуг.
Хөмүр-даш өртээ эрткен чылдың деңнелинде хевээр арткан, хөмүр-даш уургайында 1 тоннада 2220 рубль, а хөмүр-даш складындан садар өртээ Тыва Республиканың Чазааның доктаалы-биле тодараттынар болгаш складтың турар черинден хамааржыр (орук чарыгдалдары дээш оон-даа өске чүүлдер көрдүнген болур).
Бо чылын Тываның Чазаа Тываның даг-руда компаниязы-биле кады тус-тус кижилерге хөмүр-даш садарын хынаарының системазын ажылдап кылган. Чаа система езугаар чиижең садыгжыларга чонга садар хөмүр-дашты улаштыр 700 рубльге аартадып алгаш, албан-организацияларга садып-саарар чоруунга доктар-моондак болур ужурлуг.
Эрес Монгуш.