(Авамга)
Хензиг чаштан ойнап өскен
Хаялыг-Даам мээстеринче
Кезек оолдар шала часкаар
Халчып-ла каар чаңчылдыг бис.
Адыш ишти шончалайны
Ававыска сөңнеп бээр дээш,
Чолдуг кежик тыпкан ышкаш,
Чоргаар-омак чаныптар бис.
Сорунзалыг Хаялыг-Даам,
Солаңгылыг часкы хүнүм,
Ынак авам хүлүмзүрүү
Ыр-шоорум хөөннеп чору.
Хайыралыг авам сеңээ
Хаялыг-Даам шончалайын
Чүлдү-чүрээм ханызындан
Чүс-даа чылда өргүзүмзе!
23.09.23
Буян ЁНДАН.