ХЕК-ДАВАННАР

(Чурумал)
Имир өттүр аткан даңныы ышкаш чырык чоорту өөскээни-биле кады кулакка дыңналып келген таныырым хоюг аялга дыңзывышаан, сеткилимни куюмналдырып, таалалдың кавайынга чайгай бээрге, төрээн булуңум Көп-Сөөк шынаазының кедээзинде шаттар мээстериниң ак-көк хек-даваннары караамга бөкпек-бөкпээ-биле көстүгүлеп келдилер. Хоюңналган аялганың ында-хаая кыңгырт кынны каггылап турганының аайы-биле хек-даваннар шилгедек чиңге сыптарының кырында чөкпек көк коңгулуурларын ол-бо талаларынче чайгагылавышаан, дээр-биле өңнеш көк бүрүлерин часкы хүн херелдеринге уткуштур кылаяарты чада туткулап турлар.

Чайгатканым хөгжүм аялгазы хөвең ышкаш хоюг чымчаа-биле мени эргеледип, хөлдер ышкаш чалгып, чаптылып турда, чаш шаамда акыларым, угбаларымның кайда оъттап чорууру билдинмес казыралар, молдургаларга сылдап, бот-боттарын «Кап-ла кара, борбак кара кайда ойнап чорлар ирги» дижип, баштактанчып ырлажып сураглажырын-даа, чалыы шаамда бодум сай чаштыг чиңге кара кыстарга «Чиргилчинниг чиңге ховаа шивеңнеди Челер-Доруг» деп ырлап чораанымны-даа сагынгыладым.

Ынчап таалап олурумда, коңгулууржугаштар шыңгырт-шыңгырт кындыр элээн дыңзыгылааш, ында-хаая коңгур-коңгурт кынны кааптар коңгулуурлар-биле кады соксай хона бээрге, чүс-чүс адыштарның часкаашкыннары мени оттурупту.

«Ээлдек шыңгырааш» деп сам төне хона бергенинге хомудай аарак, адыштарымны часкай-ла бердим.

Салчак СОДУНАМ.

“Шын” №80 2023 чылдың октябрь 21