ОКТЯБРЬ 1 — БҮГҮ-ДЕЛЕГЕЙНИҢ УЛУГ НАЗЫЛЫГЛАР ХҮНҮ
Сентябрь 29-та Кызыл хоорайның Ленин кудумчузунуң 12 дугаарлыг бажыңынга найысылалдың хоочуннарының Курлавыр төвүнүң үшкү залының байырлыг ажыдыышкыны болуп эрткен. Аңаа төптүң кежигүннери болур «мөңгүн» волонтёрлар болгаш залды септээринге дузалашкан деткикчилер дээш чалаткан аалчылар хөй келген.
Кызыл хоорайның Хоочуннар чөвүлелиниң даргазы Ольга Дамдынның медеглээни-биле алырга, өрттенген оран-саваны хоочуннарга чоокку чылдарда ук бажыңның башкарыкчы компаниязы берген. Оон эгелээш-ле Хоочуннар чөвүлели боттарының болгаш аңгы-аңгы деткикчилерниң деткимчези-биле септеп кирипкен. Бо удаада үш дугаар залдың ажыдыышкыны болганы ол. Оран-савага найысылалдың хоочуннары хостуг үезинде чыглып турар. Ында чүгле йога эвес, ниитизи-биле он ажыг бөлгүмнер ажылдап турар.
«Хоорайның күзелдиг хоочуннарынга йога талазы-биле инструктору-дур мен. Ийи чыл дургузунда бо хоочуннар-биле ажылдадым. Йога бо үеде Тывада база дыка сайзырай берген. Чүгле аныяктар эвес, а улуг назылыглар база кадыкшылын экижидери-биле йоганы сонуургаар апарган.
Йога кижиниң мага-бодунга, кадыкшылынга, хан эргилдезинге кончуг эки салдарлыг. Сөөк-даяктың шимчээринге, дискектиң, оорга-моюннуң аарывазынга дузалаар. Хоочуннарның шимченгирин көргеш, магадаар-дыр мен. Кандыг-даа аныяктардан дээре, ээлгир улус бар» – деп, Анисья Ханды чугаалады.
«84 харлыг мен. Хүннүң-не маңаа кээп, йогалап турар мен. Дөрт дугаар чыл бо залда кээп тур мен. Чыглып турар черивистиң девискээри улгадып, үш дугаар залдың немежип турарынга аажок өөрүп тур бис. Бодум хуумда йогалаар дээш кээп турар мен. Йога аңгы-аңгы адырларлыг болур чорду. Амгы үеде йогада ийи бөлүк кээп турар. Он-он чээрби кижи бис. Йога кылбайн баарга, мага-бот дораан шимчээшкинни негей бээр-дир» – деп, хоочуннарның бирээзи Мария Шожукпан чугаалады.
Хоорайның Хоочуннар чөвүлели найысылалдың амыдыралынга идепкейлии-биле киржип, аныяктарга үлегер болуп чоруур дээрзин билир бис. Оларга ам-даа бедиктерже бурунгаарлаашкыннарны, быжыг тура-сорукту болгаш кадыкшылды күзеп каалы.
Айдың ОНДАР белеткээн.
Авторнуң тырттырган чуруу.
“Шын” №38 2025 чылдың октябрь 2Оценили 19 человекПоказать список поделившихся