«Чуртталга оран-савазы болгаш таарымчалыг хоорай хүрээлели» Национал төлевилел
Чеди-Хөл кожууннуң төвү хоорай чергелиг Хову-Аксы суурда чаагайжыды туттунган хөй квартиралыг чаа бажыңче көжүп кирерин чурттаары айыылдыг апарган эрги бажыңнарның чурттакчылары четтикпейн манап турар. Олар чаа бажыңда квартираларын барып көрүп алган, аңаа чурттай бергеш, оран-савазының иштин боттарынга таарыштыр улам чараштыр канчаар дерип алырын планнап алганнар.
Ол бажыңны шимчевес өнчү кылдыр бүрүткедир, күрүнениң кадастр даңзызынга киирер талазы-биле документилер тургузар ажыл доостур чыгаан. Бо ажыл доостурга-ла, 12 квартиралыг бажыңче өг-бүлелер өөрүшкүлүг көжүп кирер, ада-иелерниң, оларның ажы-төлүнүң омак-хөглүг чугаа-сооду, каткы-иткизи чаа оран-савага дыңналып, амыдырал-чуртталга улам амыр-чаагай апаар.
Хову-Аксы суурда хөй квартиралыг эрги ийи бажыңга чурттап турган 36 өг-бүле 2024 чылдың эгезинде чаагайжыды туткан чаа бажыңнарже көжүп киргени тус черниң чонунуң амыдырал-чуртталгазында онзагай болуушкун болган. Ол өг-бүлелерниң чүс ажыг кежигүннери чаа квартираларны алганын хөглүү-биле байырлап, чону-биле өөрүшкүзүн үлешкеннер.
Бо бажыңнарны «Чуртталга оран-савазы болгаш таарымчалыг хоорай хүрээлели» национал төлевилелдиң акша-хөреңгизи-биле туткан. Хову-Аксы суурга чаа бажыңнарны тудуп, эрги бажыңнарның чурттакчыларын ынаар көжүрер ажыл ам-даа уламчылаар. Чүге дээрге 1960 чылдарда туткан бажыңнар эргилээн.
База бир чаа бажыңның тудуу амгы үеде чоруп турар. «Тудугтускаймонтаж» кызыгаарлаан харыысалгалыг ниитилелдиң тудугжулары бажыңның бирги каъдының даштыкы болгаш иштики ханаларын тудуп үндүрүпкен. Ниити шөлү 806 дөрбелчин метр, 12 квартиралыг бажыңны бо чылдың төнчүзүнде ажыглалга киирер.
«Чуртталга оран-савазы болгаш таарымчалыг хоорай хүрээлели» национал төлевилелдиң ачызында Хову-Аксы суур чараш хоорай хевири кирип, Таңды сынның эдээниң каасталгазы апарган.
Ш. МОНГУШ белеткээн.
Чурукту интернет четкизинден хоолгалаан.
“Шын” №71 2024 чылдың сентябрь 18
